5881. පදුමුත්තරො නාම ජිනො සබ්බලොකවිදූ මුනි,
ඉතො සතසහස්සම්හි කප්පෙ උප්පජ්ජි චක්ඛුමා.

5882. ඔවාදකො විඤ්ඤාපකො තාරකො සබ්බපාණිනං,
දෙසනාකුසලො බුද්ධො තාරෙසි ජනතං බහුං.

5883. අනුකම්පකො කාරුණිකො හිතෙසී සබ්බපාණිනං,
සම්පත්තෙ තිත්ථියෙ සබ්බෙ පඤ්චසීලෙ පතිට්ඨපි.

5884. එවං නිරාකුලං ආසි සුඤ්ඤකං තිත්ථියෙහි ච,
විචිත්තං අරහන්තෙහි වසීභූතෙහි තාදිහි.

5885. රතනානට්ඨපඤ්ඤාසං උග්ගතො සො මහාමුනි,
කඤ්චනග්ඝියසඞ්කාසො බත්තිංසවරලක්ඛණො.

5886. වස්සසතසහස්සානි ආයු විජ්ජති තාවදෙ,
තාවතා තිට්ඨමානො සො තාරෙසි ජනතං බහුං.

5887. තදාහං හංසවතියං බ්රාහ්මණො වෙදපාරගු,
උපෙත්වා සත්තසාරග්ගං අස්සොසිං ධම්මදෙසනං.

5888. තදා සො සාවකං වීරො පභින්නමතිගොචරං,
අත්ථෙ ධම්මෙ ච නෙරුත්තෙ පටිභානෙ ච කොවිදං.

5889. ඨපෙසි එතදග්ගම්හි තං සුත්වා මුදිතො අහං,
සසාවකං ජිනවරං සත්තාහං භොජයිං තදා.

5890. දුස්සෙහකච්ඡාදයිත්වාන සසිස්සං බුද්ධිසාගරං,
නිපච්ච පාදමූලම්හි තං ඨානං පත්ථයිං අහං.

5891. තතො අවොච ලොකග්ගො පස්සථෙතං දිජුත්තමං,
විනතං පාදමූලෙ මෙ කමලොදරසප්පභං.

5892. බුද්ධසෙට්ඨස්ස භික්ඛුස්ස ඨානං පත්ථයතෙ අයං,
තාය සද්ධාය චාගෙන ධම්මස්ස සවණෙන ච.

5893. සබ්බත්ථ සුඛිතො හුත්වා සංසරිත්වා භවාභවෙ,
අනාගතම්හි අද්ධානෙ ලච්ඡතෙ තං මනොරථං.

5894. සතසහස්සෙ ඉතො කප්පෙ ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

5895. තස්ස ධම්මෙසු දායාදො ඔරසො ධම්මනිම්මිතො
කොට්ඨිතො නාම නාමෙන හෙස්සති සත්ථු සාවකෙ.

5896. තං සුත්වා මුදිතො හුත්වා යාවජීවං තදා ජිනං,
මෙත්තචිත්තො පරිචරිං සතො පඤ්ඤාසමාහිතො.

5897. තෙන කම්මවිපාකෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

5898. සතානං තීණික්ඛත්තුඤ්ච දෙවරජ්ජමකාරයිං,
සතානං පඤ්චක්ඛත්තුඤ්ච චක්කවත්තී අහොසහං.

5899. පදෙසරජ්ජං විපුලං ගණනාතො අසංඛියං,
සබ්බත්ථ සුඛිතො ආසිං තස්ස කම්මස්ස වාහසා.

5900. දුවෙ භවෙ සංසරාමි දෙවත්තෙ අථ මානුසෙ,
අඤ්ඤං ගතිං න ගච්ඡාමි සුචිණ්ණස්ස ඉදං ඵලං.

5901. දුවෙ කුලෙ පජායාමි ඛත්තියෙ අථ බ්රාහ්මණෙ,
නීචෙ කුලෙ න ජායාමි සුචිණ්ණස්ස ඉදං ඵලං.

5902. පච්ඡිම්භවෙසම්පත්තෙ බ්රහ්මබන්ධු අහොසහං,
සාවත්ථියං විප්පකුලෙ පච්චාජාතො මහද්ධනෙ.

5903. මාතා චන්දවතී නාම පිතා මෙ අස්සලායනො,
යදා මෙ පිතරං බුද්ධො විනයී සබ්බසුද්ධියා.

5904. තදා පසන්නො සුගතෙ පබ්බජිං අනගාරියං,
මොග්ගල්ලානො ආචරියො උපජ්ඣො සාරිසම්භවො.