5663. පදුමුත්තරො නාම ජිනො අනෙජො අජිතඤ්ජයො,
සතසහස්සෙ කප්පානං ඉතො උප්පජ්ජි නායකො.

5664. වීරො කමලපත්තක්ඛො සසඞ්කවිමලානනො,
කනකාවලසඞ්කාසො රවිදිත්තිසමප්පභො.

5665. සත්තනෙත්තමනොහාරී වරලක්ඛණභුසිතො,
සබ්බවාක්යපථාතීතො මනුජාමරසක්කතො.

5666. සම්බුද්ධො බොධයං සත්තෙ වාගීසො මධුරස්සරො,
කරුණානිබද්ධ සන්තානො පරිසාසු විසාරදො.

5667. දෙසෙති මධුරං ධම්මං චතුසච්චුපසංහිතං,
නිමුග්ගෙ මොහපඞ්කම්හි සමුද්ධරති පාණිනො.

5668. තදා එකචරො හුත්වා තාපසො හිමවාලයො,
නභසා මානුසං ලොකං ගච්ඡන්තො ජිනමද්දසං.

5669. උපෙච්ච සන්තිකං තස්ස අස්සොසිං ධම්මදෙසනං,
වණ්ණයන්තස්ස වීරස්ස සාවකස්ස මහාගුණං.

5670. සංඛිත්තෙන මයා වුත්තං විත්ථාරෙන පකාසයං,
පරිසං මඤ්ච තොසෙති යථා කච්චායනො අයං.

5671. නාහං එවං විධං කඤ්චි අඤ්ඤං පස්සාමි සාවකං,
තස්මාතදග්ගෙ එසග්ගො එවං ධාරෙථ භික්ඛවො.

5672. තදාහං විම්හිතො හුත්වා සුත්වා වාක්යං මනොරමා,
හිමවන්තං ගමිත්වාන ආහත්වා පුප්ඵසඤ්චයං.

5673. පූජෙත්වා ලොකසරණං තං ඨානං අභිපත්ථයිං,
තදා මමාසයං ඤත්වා ව්යාකාසි සරණඤ්ජහො.

5673. “පස්සථෙතං ඉසිවරං නිද්ධන්තකනකත්තචං,
උද්ධග්ගලොමං පීණංසං අචලං පඤ්ජලිං ඨිතං.

5674. හාසස්සුපුණ්ණනයනං බුද්ධවණ්ණගතාසයං,
ධම්මංව විග්ගහවරං අමතාසිත්තසන්තිභං.

5675. කච්චානස්ස ගුණං සුත්වා තං ඨානං පත්ථයං ඨිතො,
අනාගතම්හි අද්ධානෙ ගොතමස්ස මහාමුනෙ.

5676. තස්ස ධම්මෙසු දායාදො ඔරසො ධම්මනිම්මිතො,
කච්චානො නාම නාමෙන හෙස්සති සත්ථුසාවකො.

5677. බහුස්සුතො මහාඤාණී අධිප්පායවිදූ මුනෙ,
පාපුණිස්සති තං ඨානං යථායං ව්යාකතො මයා.

5678. සතසහස්සෙ ඉතො කප්පෙ යං කම්මමකරිං තදා,
දුග්ගතිං නාභිජානාමි බුද්ධපූජායිදං ඵලං.

5679. දුවෙ භවෙ සංසරාමි දෙවත්තෙ අථ මානුසෙ,
අඤ්ඤං ගතිං න ගච්ඡාමි බුද්ධපූජායිදං ඵලං.

5680. දුවෙ කුලෙ පජායාමි ඛත්තියෙ අථ බ්රාහ්මණෙ,
නීචෙ කුලෙ න ජායාමි බුද්ධපූජායිදං ඵලං.

5681. පච්ඡිමෙ ව භවෙ දානි ජාතො උජ්ජෙනියා පුරෙ,
පජ්ජොතස්ස ච චණ්ඩස්ස පුරොහිතදිජාතිනො.

5682. පුත්තො තිරිටවච්ඡස්ස නිපුණො වෙදපාරගූ,
මාතා ච චන්දිමා නාම කච්චානොහං වරත්තවො.

5683. වීමංසත්ථං බුද්ධස්ස භූමිපාලෙන පෙසිතො,
දිස්වා මොක්ඛපුරද්වාරං නායකං ගුණසඤ්චයං.

5684. සුත්වා ච විමලං වාක්යං ගතිපඞ්කවිසොසනං,
පාපුණිං අමතං සන්තං සොසෙහි සහ සත්තහි.

5685. අධිප්පායවිදූ ජාතො සුගතස්ස මහාමුනෙ,
ඨපිතො එතදග්ගෙ ච සුසමිද්ධමනොරථො.

5686. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.