5585. අහං පුරෙ බොධිපත්තං උජ්ඣිතං චෙතියඞ්ගණෙ,
තං ගහෙත්වාන ඡඩ්ඩෙසිං අලභිං වීසති ගුණෙ.

5586. තස්ස කම්මස්ස තෙජෙන සංසරන්තො භවාභවෙ,
දුවෙ භවෙ සංසරාමි දෙවත්තෙ චාපි මානුසෙ.

5587. දෙවලොකා චවිත්වාන ආගන්ත්වා මානුසං භවං,
දුවෙ කුලෙ පජායාමි ඛත්තියෙ චාපි මානුසෙ.

5588. අඞ්ගපච්චඞ්ගසම්පන්නො ආරොහපරිණාහවා,
අභිරූපො සුචි හොමි සම්පුණ්ණඞ්ගො අනූනකො.

5589. දෙවලොකෙ මනුස්සෙ වා ජාතො වා යත්ථ කත්ථචි,
භවෙ සුවණ්ණවණ්ණොව උත්තත්තකනකූපමො.

5590. මුදුකා මද්දවා සනිද්ධා සුඛුමා සුකුමාරිකා,
ඡවි මෙ සබ්බදා හොති බොධිපත්තෙ සුඡඩ්ඩිතෙ.

5591. යතො කුතොචි ගතිසු සරීරෙ සමුදාගතෙ,
න ලිම්පති රජොජල්ලං විපාකො පත්තඡඩ්ඩනෙ.

5592. උණ්හෙ වාතාතපෙ තස්ස අග්ගිතාපෙන වා පුන,
ගත්තෙ සෙදා න මුච්චන්ති විපාකො පත්තඡඩ්ඩනෙ.

5593. කුට්ඨං ගණ්ඩො කිලාසො ච තිලකා පිළකා තථා,
න හොන්ති කායෙ දද්දු ච විපාකො පත්තඡඩ්ඩනෙ.

5594. අපරම්පි ගුණං තස්ස නිබ්බත්තති භවාභවෙ,
රොගා න හොන්ති කායස්මිං විපාකො පත්තඡඩ්ඩනෙ.

5595. අපරම්පි ගුණං තස්ස නිබ්බත්තති භවාභවෙ,
න හොති චිත්තජා පීළා විපාකො පත්තඡඩ්ඩනෙ.

5596. අපරම්පි ගුණං තස්ස නිබ්බත්තති භවාභවෙ,
අමිත්තා න භවන්තස්ස විපාකො පත්තඡඩ්ඩනෙ.

5597. අපරම්පි ගුණං තස්ස නිබ්බත්තති භවාභවෙ,
අනූනභොගො භවති විපාකො පත්තඡඩ්ඩනෙ.

5598. අපරම්පි ගුණං තස්ස නිබ්බත්තති භවාභවෙ,
අග්ගිරාජුහි චොරෙහි න හොති උදකෙ භයං.

5599. අපරම්පි ගුණං තස්ස නිබ්බත්තති භවාභවෙ,
දාසිදාසා අනුචරා හොන්ති චිත්තානුවත්තකා.

5600. යම්හි ආයුප්පමාණම්හි ජායතෙ මානුසෙ භවෙ,
තතො න හායතෙ ආයු තිට්ඨතෙ යාවතායුකං.

5601. අබ්භන්තරා බාහිරා ච නෙගමා ච සරට්ඨකා,
අනුයුත්තා හොන්ති සබ්බෙ වුද්ධිකාමා සුඛිච්ඡකා.

5602. භොගවා යසවා හොමි සිරිමා ඤාතිපක්ඛවා,
අපෙතභයසන්තාසො භවෙ’හං සබ්බතො භවෙ.

5603. දෙවා මනුස්සා අසුරා ගන්ධබ්බා යක්ඛරක්ඛසා,
සබ්බෙ තෙ පරිරක්ඛන්ති භවෙ සංසරතො සදා.

5604. දෙවලොකෙ මනුස්සෙ ච අනුභොත්වා උභො යසෙ,
අවසානෙ ච නිබ්බානං සිවං පත්තො අනුත්තරං.

5605. සම්බුද්ධමුද්දිසිත්වාන බොධිං වා තස්ස සත්ථුනො,
යො පුඤ්ඤං පසවෙ පොසො තස්ස කිං නාම දුල්ලභං.

5606. මග්ගෙ ඵලෙ ආගමෙ ච ඣානාභිඤ්ඤාගුණෙසු ච,
අඤ්ඤෙසං අධිකො හුත්වා නිබ්බායාමි අනාසවො.