5617. ඉමම්හි භද්දකෙ කප්පෙ බ්රහ්මබන්ධු මහායසො,
කස්සපො නාම ගොත්තෙන උප්පජ්ජි වදතංවරො.

5618. අනුව්යඤ්ජනසම්පන්නො බත්තිංසවරලක්ඛණො,
බ්යාමප්පභාපරිවුතො රංසුජාලසමොසටො.

5619. අස්සාසෙතා යථා චන්දො සුරියොව පභඞ්කරො,
නිබ්බාපෙතා යථා මෙඝො සාගරො’ව ගුණාකරො.

5620. ධරණීරිව සීලෙන හිමවා’ව සමාධිනා,
ආකාසො විය පඤ්ඤාය අසඞ්ගො අනිලො යථා.

5621. ස කදාචි මහාවීරො පරිසාසු විසාරදො,
සච්චානි සම්පකාසෙසි උද්ධරන්තො මහාජනං.

5622. තදාහි බාරාණසියං සෙට්ඨිපුත්තො මහායසො,
ආසහං ධනධඤ්ඤස්ස පහුතස්ස පභූ තදා.

5623. ජඞ්ඝාවිහාරං විචරං මිගදායමුපෙච්චහං,
අද්දසං විරජං බුද්ධං දෙසෙන්තං අමතං පදං.

5624. විස්සට්ඨකන්තවචනං කරවීකසමස්සරං,
හංසරුදාභිනිග්ඝොසං විඤ්ඤාපෙන්තං මහාජනං.

5625. දිස්වා දෙවාතිදෙවං තං සුත්වා ච මධුරං ගිරං,
පහායානප්පකෙ භොගෙ පබ්බජිං අනගාරියං.

5626. එවං පබ්බජිතො චාහං න චිරෙන බහුස්සුතො,
අහොසිං ධම්මකථිකො විචිත්තපටිභාණවා.

5627. මහාපරිසමජ්ඣෙහං හට්ඨචිත්තො පුනප්පුනං,
වණ්ණයිං හෙමවණ්ණස්ස වණ්ණං වණ්ණවිසාරදො.

5628. එස ඛීණාසවො බුද්ධො අනීඝො ඡින්නසංසයො,
සබ්බකම්මක්ඛයං පත්තො විමුත්තොපධිසංඛයෙ.

5629. එස සො භගවා බුද්ධො එස සීහො අනුත්තරෙ,
සදෙවකස්ස ලොකස්ස බ්රහ්මචක්කප්පවත්තකො.

5630. දන්තො දමෙතා සන්තො ච සමෙතා නිබ්බුතො ඉසි,
නිබ්බාපෙතා ච අස්සත්ථො අස්සාසෙතා මහාජනං.

5631. වීරො සූරො ච ධීරො ච පඤ්ඤො කාරුණිකො වසී,
විජිතාවී ච ස ජිනො අප්පගබ්භො අනාලයො.

5632. අනෙජො අචලො ධීමා අමොහො අසමො මුනි,
ධොරය්හො උසභො නාගො සීහො සක්කො ගරූසුපි.

5633. විරාගො විමලො බ්රහ්මා වාදසූරො රණඤ්ජහො,
අඛිලො ච විසල්ලො ච අසමො සංයුතො සුචි.

5634. බ්රාහ්මණො සමණො නාථො භිසක්කො සල්ලකත්තකො,
යොධො බුද්ධො සුතො සුතො අචලො මුදිතොදිතො.

5635. ධාතා ධතා ච හන්තා ච කත්තා නෙතා පකාසිතා,
සම්පහංසිතා භෙත්තා ච ඡෙත්තා සොතා පසංසිතා.

5636. අඛිලො ච විසල්ලො ච අනීඝො අකථඞ්කථී,
අනෙජො විරජො ඛන්තා ගන්තා වත්තා පකාසිතා

5637. තාරෙතා අත්ථකාරෙතා කාරෙතා සම්පදාලිතා,
පාපෙතා සහිතා කන්තා හන්තා ආතා පී තාපසො.