5532. හිමවන්තස්ස අවිදූරෙ රොමසො නාම පබ්බතො,
බුද්ධොපි සම්භවො නාම අබ්භොකාසෙ වසී තදා.

5533. භවනා නික්ඛමිත්වාන පදුමං ධාරයිං අහං,
එකාහං ධාරයිත්වාන භවනං පුනරාගමිං.

5534. එකතිංසෙ ඉතො කප්පෙ යං බුද්ධමභිපූජයිං,
දුග්ගතිං නාභිජානාමි බුද්ධපූජායිදං ඵලං.

5535. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

5536. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5537. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

කුරඤ්ජියං කපිත්ථඤ්ච කොසුම්භමථ කෙතකං,
නාගපුප්ඵජ්ජුනං චෙව කුටජී ඝොසසඤ්ඤකො,
ථෙරො ච සබ්බඵලදො තථා පදුමධාරකො,
අසීති චෙත්ථ ගාථායො තිස්සො ගාථා තදුත්තරි.