5448. නගරෙ බන්ධුමතියා ආරාමිකො අහං තදා,
අද්දසං විරජං බුද්ධං ගච්ඡන්තං අනිලඤ්ජසෙ.

5449. නාළිකෙරඵලං යඝ බුද්ධසෙට්ඨස්සදාසහං,
ආකාසෙ ඨිතකො සන්තො පතිගණ්හී මහායසො.

5450. විත්තිසඤ්ජනනං මය්හං දිට්ඨධම්මසුඛාවහං,
ඵලං බුද්ධස්ස දත්වාන විප්පසන්නෙන චෙතසා.

5451. අධිගච්ඡිං තදා පීතිං විපුලං ච සුඛුත්තමං,
උප්පජ්ජතෙ ච රතනං නිබ්බත්තස්ස තහිං තහිං.

5452. එකනවුතෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි ඵලදානස්සිදං ඵලං.

5453. දිබ්බචක්ඛු විසුද්ධං මෙ සමාධිකුසලො අහං,
අභිඤ්ඤාපාරමිප්පත්තො ඵලදානස්සිදං ඵලං.

5454. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

5455. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5456. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

කණිකාරෙකපත්තො ච කාසුමාරී තථාවටං,
වාරඤ්ච මාතුලුඞ්ගඤ්ච අජෙලාමොදමෙව ච.
තාලං තථා නාළිකෙරං ගාථායො ගණිතා විහ,
එකං ගාථාසතං හොති ඌනාධිකවිවජ්ජිතං.

5457. මිගලුද්දො පුරෙ ආසිං විපිනෙ විචරං අහං,
අද්දසං විරජං බුද්ධං සබ්බධම්මානපාරගුං.

5458. කුරඤ්ජියඵලං ගය්හ බුද්ධසෙට්ඨස්ස’දාසහං,
පුඤ්ඤක්ඛෙත්තස්ස වීරස්ස පසන්නො සෙහි පාණිහි.

5459. එකතිංසෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි ඵලදානස්සිදං ඵලං.