5304. හිමවන්තස්ස අවිදූරෙ යමකො නාම පබ්බතො,
අස්සමො සුකතො මය්හං පණ්ණසාලා සුමාපිතා.

5305. නාරදො නාම නාමෙන ජටිලො උග්ගතාපනො,
චතුද්දසසහස්සානි සිස්සා පරිචරන්ති මං.

5306. පටිසල්ලීනකො සන්තො එවං චින්තෙසහං තදා:
සබ්බො ජනො මං පූජෙති නාහං පූජෙමි කිඤ්චනං.

5307. න මෙ ඔවාදකො අත්ථි වත්තා කොචි න විජ්ජති,
අනාචරියුපජ්ඣායො වනෙ වාසං උපෙමහං.

5308. උපාසමානො යමහං ගරුචිත්තං උපට්ඨහෙ,
සො මෙ ආචරියො නත්ථි වනවාසො නිරත්ථකො.

5309. ආයාගම්මෙ ගවෙසිස්සං ගරුං භාවනියං තථා,
සාවස්සයො වසිස්සාමි න කොචි ගරහිස්සති.

5310. උත්තානකූලා නදිකා සුපතිත්ථා මනොරමා,
සුසුද්ධපුලිනාකිණ්ණා අවිදූරෙ මමස්සමං.

5311. නදිං අමරිකං නාම උපගන්ත්වානහං තදා,
සංවඩ්ඪයිත්වා පුලිනං අකං පුලිනචෙතියං.

5312. යෙ තෙ අහෙසුං සම්බුද්ධා භවන්තකරණා මුනී,
තෙසං එතාදිසො ථූපො තන්තිමිත්තං කරොමහං.

5313. කරිත්වා පුලිනං ථූපං සොවණ්ණං මාපයිං අහං,
සොණ්ණකිඞ්කණිපුප්ඵානං සහස්සෙ තීණි පූජයිං.

5314. සායං පාතං නමස්සාමි වෙදජාතො කතඤ්ජලී,
සම්මුඛා විය සම්බුද්ධා වන්දිං පුලිනචෙතියං.

5315. යදා කිලෙසා ජායන්ති විතක්කා ගෙහනිස්සිතා,
සරාමි සුගතං ථූපං පච්චවෙක්ඛාමි තාවදෙ.

5316. උපනිස්සාය විහරං සත්ථවාහං විනායකං,
කිලෙසෙ සංවසෙය්යාසි න යුත්තං තව මාරිස.

5317. සහ ආවජ්ජිතෙ ථූපෙ ගාරවං හොති මෙ තදා,
කුවිතක්කෙ විනොදෙමි නාගො තුත්තට්ටිතො යථා.

5318. එවං විහරමානං මං මච්චුරාජාභිමද්දථ,
තත්ථ කාලකතො සන්තො බ්රහ්මලොකං අගච්ඡහං.

5319. යාවතායුං වසිත්වාන තිදසෙ උපපජ්ජහං,
අසීතික්ඛත්තුං දෙවින්දො දෙවරජ්ජමකාරයිං.

5320. සතානං තීණික්ඛත්තුඤ්ච චක්කවත්තී අහොසහං,
පදෙසරජ්ජං විපුලං ගණනාතො අසංඛියං.