5273. කිංසුකං පුප්ඵිතං දිස්වා පග්ගහෙත්වාන අඤ්ජලිං,
බුද්ධසෙට්ඨං සරිත්වාන ආකාසෙ අභිපූජයිං.

5274. තෙන කම්මෙන සුකතෙන චෙතනා පණිධීහි ච,
ජහිත්වා මානුසං දෙහං තාවතිසමගච්ඡහං.

5275. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි බුද්ධපූජායිදං ඵලං.

5276. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

5277. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5278. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

5279. පදුමුත්තරස්ස භගවතො සුජාතො නාම සාවකො,
පංසුකූලං ගවෙසන්තො සංකාරෙ චරතී තදා,

5280. නගරෙ හංසවතියා පරෙසං භතකො අහං,
උපඩ්ඪදුස්සං දත්වාන සිරසා අභිවාදයිං.

5281. තෙන කම්මෙන සුකතෙන චෙතනාපණීධිහි ච,
ජහිත්වා මානුසං දෙහං තාවතිංසමගච්ඡහං.

5282. තෙත්තිංසක්ඛත්තුං දෙවින්දො දෙවරජ්ජමකාරයි,
සත්තසත්තතික්ඛත්තුඤ්ච චක්කවත්ති අහොසහං.

5283. පදෙසරජ්ජං විපුලං ගණනාතො අසඞ්ඛියං,
උපඩ්ඪදුස්සදානෙන මොදාමි අකුතොභයො.

5284. ඉච්ඡමානො චහං අජ්ජ සකානනං සපබ්බතං,
ඛොමදුස්සෙහි ඡාදෙය්යං අඩ්ඪදුස්සස්සිදං ඵලං.

5285. සතසහස්සෙ ඉතො කප්පෙ යං දානමදදිං තදා,
දුග්ගතිං නාභිජානාමි අඩ්ඪදුස්සස්සිදං ඵලං.

5286. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

5287. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5288. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

5289. සුචින්තිතං භගවන්තං ලොකජෙට්ඨං නරාසභං,
උපවිට්ඨං මහාරඤ්ඤං වාතාබාධෙන පීළිතං.
දිස්වා චිත්තං පසාදෙත්වා ඝතමණ්ඩං උපානයිං.

5290. කතත්තා ආචිතත්තා ච ගඞ්ගා භාගීරථී අයං,
මහාසමුද්දා චත්තාරො ඝතං සම්පජ්ජරෙ මම.

5291. අයං ච පඨවී ඝොරා අප්පමාණා අසංඛියා,
මම සඞ්කප්පමඤ්ඤාය භවතෙ මධුසක්ඛරා.

5292. චාතුද්දිපා ඉමෙ රුක්ඛා පාදපා ධරණීරුහා,
මම සඞ්කප්පමඤ්ඤාය කප්පරුක්ඛා භවන්ති තෙ.

5293. පඤ්ඤාසක්ඛත්තුං දෙවින්දො දෙවරජ්ජමකාරයිං,
එකපඤ්ඤාසක්ඛත්තුඤ්ච චක්කවත්තී අහොසහං.
පදෙසරජ්ජං විපුලං ගණනාතො අසංඛියං.

5294. ඡන්නවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි ඝතමණ්ඩස්සිදං ඵලං.