5256. හිමවන්තස්ස අවිදූරෙ උදඞ්ගණො නාම පබ්බතො,
තත්ථද්දසං පංසුකූලං දුමග්ගම්හි විලම්බිතං.

5257. තීණි කිඞ්කණිපුප්ඵානි ඔචිනිත්වානහං තදා,
හට්ඨො හට්ඨෙන චිත්තෙන පංසුකූලං අපූජයිං.

5258. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

5259. එකනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පූජෙත්වා අරහද්ධජං.

5260. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

5261. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5262. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

5263. වනකම්මිකො පුරෙ ආසිං පිතුපිතාමහෙනහං,
පසුමාරෙන ජීවාමි කුසලං මෙ න විජ්ජති.

5264. මම ආසයසාමන්තා තිස්සො ලොකග්ගනායකො,
තීණි පදානි දස්සෙසි අනුකම්පාය චක්ඛුමා.

5265. අක්කන්තෙ ච පදෙ දිස්වා තිස්සනාමස්ස සත්ථුනො,
හට්ඨො හට්ඨෙන චිත්තෙන පාදෙ චිත්තං පසාදයිං.

5266. කොරණ්ඩං පුප්ඵිතං දිස්වා පාදපං ධරණීරුහං,
සකොසකං ගහෙත්වාන පදසෙට්ඨමපූජයිං.

5267. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

5268. යං යං යොනුපපජ්ජාමි දෙවත්තං අථ මානුසං,
කොරණ්ඩකච්ඡවී හොමි පස්සභාසො භවාමහං.

5269. ද්වෙනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පදපූජායිදං ඵලං.

5270. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.