5352. මිගලුද්දො පුරෙ ආසි විපිනෙ විචරං තදා,
අද්දසං විරජං බුද්ධං සබ්බධම්මානපාරගුං.

5353. පියාලඵලමාදාය බුද්ධසෙට්ඨස්සදාසහං,
පුඤ්ඤක්ඛෙත්තස්ස වීරස්ස පසන්නො සෙහි පාණිහි.

5354. එකතිංසෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි ඵලදානස්සිදං ඵලං.

5355. කිලෙසා ඣාපිතා මය්හං භාවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

5356. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

5357. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

කිඞ්කණි පංසුකූලඤ්ච කොරණ්ඩමථ කිංසුකං
උපඩ්ඪදුස්සී ඝතදො උදකං ථූපකාරකො
නළාගාරී ච නවමො පියාලඵලදායකො.
සතං එකං ච ගාථානං නවකඤ්ච තදුත්තරිං.

මෙත්තෙය්යවග්ගො භද්දාලි සකිංසම්මජ්ජකො පි ච
එකවිහාරී වීභීටකී ජගතී සාලපුප්ඵියො
නළාගාරං පංසුකූලං කිඞ්කණිපුප්ඵියො තථා.
අසීති ද්වෙ ච ගාථායො චතුද්දසසතානි ච.

5358. සුමෙධො නාම සම්බුද්ධො බත්තිංසවරලක්ඛණො,
විවෙකකාමො භගවා හිමවන්තමුපාගමි.

5359. අජ්ඣොගහෙත්වා හිවවන්තං අග්ගො කාරුණිකො මුනි,
පල්ලඞ්කං ආභුජිත්වාන නිසීදි පුරිසුත්තමො.

5360. විජ්ජාධරෙ තදා ආසිං අන්තලික්ඛචරො අහං,
තිසූලං සුකතං ගය්හ ගච්ඡාමි අම්බරෙ තදා.

5361. පබ්බතග්ගෙ යථා අග්ගි පුණ්ණමාසීව චන්දිමා,
වනෙ ඔභාසතෙ බුද්ධො සාලරාජාව ඵුල්ලිතො.

5362. වනග්ගා නික්ඛමිත්වාන බුද්ධරංසී විධාවරෙ,
නළග්ගිවණ්ණසඞ්කාසා දිස්වා චිත්තං පසාදයිං.

5363. විචිනං අද්දසං පුප්ඵං කණිකාරං දෙවගන්ධිකං,
තීණි පුප්ඵානි ආදාය බුද්ධසෙට්ඨං අපූජයිං.

5364. බුද්ධස්ස ආනුභාවෙන තීණි පුප්ඵානි මෙ තදා,
උද්ධ වණ්ටා අධොපත්තා ඡායං කුබ්බන්ති සත්ථුනො.

5365. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.