1168. පදුමුත්තරසම්බුද්ධං මෙත්තචිත්තං මහාමුනිං,
උපෙති ජනතා සබ්බා සබ්බලොකග්ගනායකං.

1169. වත්ථං සෙනාසනං චෙව ආමිසං පානභොජනං,
දදන්ති සත්ථුනො සබ්බෙ පුඤ්ඤක්ඛෙත්තෙ අනුත්තරෙ.

1170. අහම්පි දානං දස්සාමි දෙවදෙවස්ස තාදිනො,
බුද්ධසෙට්ඨං නිමන්තෙත්වා සංඝම්පි ච අනුත්තරං.

1171. උය්යොජිතා මයා චෙතෙ නිමන්තෙසුං තථාගතං,
කෙවලං භික්ඛුසඞ්ඝඤ්ච පුඤ්ඤක්ඛෙත්තං අනුත්තරං.

1172. සතසහස්සපල්ලඞ්කං සොවණ්ණං ගොණකත්ථතං,
තූලිකා පටලිකාය ඛොමකප්පාසිකෙහි ච,
මහාරහං පඤ්ඤපෙසිං ආසනං බුද්ධයුත්තකං.

1173. පදුමුත්තරො ලොකවිදූ දෙවදෙවො නරාසභො,
භික්ඛුසංඝපරිබ්බූළ්හො මම ද්වාරං උපාගමි.

1174. පච්චුග්ගන්ත්වාන සම්බුද්ධං ලොකනාථං යසස්සිනං,
පසන්නචිත්තො සුමානො අතිනාමයිං සකං ඝරං.

1175. භික්ඛූනං සතසහස්සං බුද්ධඤ්ච ලොකනායකං,
පසන්නචිත්තො සුමනො පරමන්නෙන තප්පයිං.

1176. පදුමුත්තරො ලොකවිදූ ආහුතීනං පටිග්ගහො,
භික්ඛුසංඝෙ නිසීදිත්වා ඉමා ගාථා අභාසථ:

1177. “යෙනිදං ආසනං දින්නං සොවණ්ණං ගොණකත්ථතං,
තමහං කිත්තයිස්සාමි සුණාථ මම භාසතො.

1178. චතුසත්තතික්ඛත්තුං සො දෙවරජ්ජං කරිස්සති,
අනුභොස්සති සම්පත්තිං අච්ඡරාහි පුරක්ඛතො.

1179. පදෙසරජ්ජං සහස්සං වසුධං ආවසිස්සති,
එකපඤ්ඤාසක්ඛත්තුඤ්ච චක්කවත්තී භවිස්සති.

1180. සබ්බාසු භවයොනීසු උච්චාකුලී භවිස්සති,
සො ච පච්ඡා පබ්බජිත්වා සුක්කමූලෙන චොදිතො,
භද්දියො නාම නාමෙන හෙස්සති සත්ථුසාවකො.”

1181. විවෙකමනුයුත්තො’ම්හි පන්තසෙනනිවාසහං,
ඵලඤ්චාධිගතං සබ්බං චත්තක්ලෙසො’ම්හි අජ්ජ’හං.

1182. මම සබ්බං අභිඤ්ඤාය සබ්බඤ්ඤූ ලොකනායකො,
භික්ඛුසංඝෙ නිසීදිත්වා එතදග්ගෙ ඨපෙසි මං.

1183. පටිසම්භිදා -පෙ- කතං බුද්ධස්ස සාසනං.