4864. පරිනිබ්බුතෙ භගවති ජලජුත්තමනාමකෙ,
ආරොපිතම්හි චිතකෙ සාලපුප්ඵමපූජයිං.

4865. සතසහස්සෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි චිතපූජායිදං ඵලං.

4866. කිලෙසා ඣාපිතා මය්හං භවා සබ්බෙ සමූහතා,
සබ්බාසවා පරික්ඛීණා විහරාමි අනාසවො.

4867. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4868. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4869. ඣායමානස්ස භගවතො සිඛිනො ලොකබන්ධුනො,
අට්ඨචම්පකපුප්ඵානි චිතකං අභිරොපයිං.

4870. එකතිංසෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි චිතකපූජායිදං ඵලං.

4871. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4872. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4873. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4874. දය්හමානෙ සරීරම්හි වෙස්සභුස්ස මහෙසිනො,
ගන්ධොදකං ගහෙත්වාන චිතං නිබ්බාපයිං අහං.

4875. එකතිංසෙ ඉතො කප්පෙ චිතං නිබ්බාපයිං අහං,
දුග්ගතිං නාභිජානාමි ගන්ධොදකස්සිදං ඵලං.

4876. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.