4854. නීහරන්තෙ සරීරම්හි වජ්ජමානාසු භෙරිසු,
පසන්නචිත්තො සුමනො පට්ටිපුප්ඵමපූජයිං,

4855. සතසහස්සෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි දෙහපූජායිදං ඵලං.

4856. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4857. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං

4858. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4859. චිතෙසු කයිරමානෙසු නානාගන්ධෙ සමාහටෙ
පසන්නචිත්තො සුමනො ගන්ධමුට්ඨිමපූජයිං.

4860. සතසහස්සෙ ඉතො කප්පෙ චිතකං යමපූජයිං,
දුග්ගතිං නාභිජානාමි චිතපූජායිදං ඵලං.

4861. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4862. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4863. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

ජගතී මොරහත්ථී ච ආසනී උක්කධාරකො,
අක්කමී වනකොරණ්ඩි ඡත්තදො ජාතිපූජකො.
පට්ටිපුප්ඵී ච යො ථෙරො දසමො ගන්ධපූජකො,
සත්තසට්ඨි ච ගාථායො ගණිතායො විභාවිහි.

4864. පරිනිබ්බුතෙ භගවති ජලජුත්තමනාමකෙ,
ආරොපිතම්හි චිතකෙ සාලපුප්ඵමපූජයිං.

4865. සතසහස්සෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි චිතපූජායිදං ඵලං.

4866. කිලෙසා ඣාපිතා මය්හං භවා සබ්බෙ සමූහතා,
සබ්බාසවා පරික්ඛීණා විහරාමි අනාසවො.