4805. මොරහත්ථං ගහෙත්වාන උපෙසිං ලොකනායකං,
පසන්නචිත්තො සුමනො මොරහත්ථමදාසහං.

4806. ඉමිනා මොරහත්ථෙන චෙතනා පණිධීහි ච,
නිබ්බායිංසු තයො අග්ගී ලභාමි විපුලං සුඛං.

4807. අහො බුද්ධා අහො ධම්මා අහො නො සත්ථුසම්පදා,
දත්වානහං මොරහත්ථං ලභාමි විපුලං සුඛං.

4808. තියග්ගී නිබ්බුතා මය්හං භවා සබ්බෙ සමූහතා,
සබ්බාසවා පරික්ඛීණා නත්ථි’දානි පුනබ්භවො.

4809. එකතිංසෙ ඉතො කප්පෙ යං දානමදදිං තදා,
දුග්ගතිං නාභිජානාමි මොරහත්ථස්සිදං ඵලං.

4810. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4811. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4812. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4813. තිස්සස්සාහං භගවතො බොධිරුක්ඛමවන්දිසං,
පග්ගය්හං වීජනිං තත්ථ සීහාසනමවීජයිං.

4814. ද්වෙනවුතෙ ඉතො කප්පෙ සීහාසනමවීජහං,
දුග්ගතිං නාභිජානාමි වීජනාය ඉදං ඵලං.

4815. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4816. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං

4817. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4818. පදුමුත්තරබුද්ධස්ස බොධියා පාදපුත්තමෙ,
පසන්නචිත්තො සුමනො තයො උක්කා අධාරයිං.

4819. සතසහස්සෙ ඉතො කප්පෙ සොහං උක්කමධාරයිං,
දුග්ගතිං නාභිජානාමි උක්කාදානස්සිදං ඵලං.

4820. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4821. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං

4822. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4823. කකුසන්ධස්ස මුනිනො බ්රාහ්මණස්ස වුසීමතො,
දිවාවිහාරං වජතො අක්කමනමදාසහං.

4824. ඉමස්මිං යෙව කප්පස්මිං යං දානමදදිං තදා,
දුග්ගතිං නාභිජානාමි අක්කමනස්සිදං ඵලං.

4825. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.