4777. පදුමුත්තරබුද්ධස්ස බොධියා පාදපුත්තමෙ,
වෙදිකං සුකතං කත්වා සකං චිත්තං පසාදයිං.

4778. අතොළාරානි භණ්ඩානි කතානි අකතානි ච,
අන්තළික්ඛා පවස්සන්ති වෙදිකාය ඉදං ඵලං.

4779. උභතො ව්යුළ්හසඞ්ගාමෙ පක්ඛන්දන්තො භයානකෙ,
භයභෙරවං න පස්සාමි වෙදිකාය ඉදං ඵලං.

4780. මම සඞ්කප්පමඤ්ඤාය ව්යම්භං නිබ්බත්තතෙ සුභං,
සයනානි මහග්ඝානි වෙදිකාය ඉදං ඵලං.

4781. සතසහස්සෙ ඉතො කප්පෙ යං වෙදිකමකාරයිං,
දුග්ගතිං නාභිජානාමි වෙදිකාය ඉදං ඵලං.

4782. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4783. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං

4784. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4785. සිද්ධත්ථස්ස භගවතො දිපදින්දස්ස තාදිනො,
පසන්නචිත්තො සුමනො බොධිඝරමකාරයිං.

4786. තුසිතං උපපන්නොම්හි වසාමි රතනෙ ඝරෙ,
න මෙ සීතං වා උණ්හං වා වාතො ගත්තෙ න සමඵුසෙ.

4787. පඤ්චසට්ඨිම්හිතො කප්පෙ චක්කවත්තී අහොසහං,
කායිකං නාම නගරං විස්සකම්මෙන මාපිතං.

4788. දසයොජනආයාමං අට්ඨයොජනවිත්ථතං,
න තම්හි නගරෙ අත්ථි කට්ඨං වල්ලී ච මත්තිකා.

4789. තිරියං යොජනං ආසි අඩ්ඪයොජනචිත්ථතො,
මඞ්ගලො නාම පාසාදො විස්සකම්මෙන මාපිතො.

4790. චුල්ලාසීතිසහස්සානි ථම්හා සොණ්ණමයා අහුං,
මණිමයා ච නිය්යුහා ඡදනං රූපියං අහු.

4791. සබ්බසොණ්ණමයං ඝරං විස්සකම්මෙන මාපිතං,
අජ්ඣාවුත්ථං මයා එතං ඝරදානස්සිදං ඵලං.

4792. තෙ සබ්බෙ අනුභොත්වාන දෙවමානුසකෙ භවෙ,
අජ්ජ පත්තොම්හි නිබ්බානං සන්තිපදමනුත්තරං.

4793. චතුනවුතෙ ඉතො කප්පෙ බොධිඝරමකාරයිං,
දුග්ගතිං නාභිජානාමි ඝරදානස්සිදං ඵලං.

4794. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

4795. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.