4435. වනචාරී පුරෙ ආසිං සතතං වනකම්මිකො,
පත්ථොදනං ගහෙත්වාන කම්මන්තං ආගමාසහං.

4436. තත්ථද්දසාසිං සම්බුද්ධං සයම්භූං අපරාජිතං,
වනා පිණ්ඩාය නික්ඛන්තං දිස්වා චිත්තං පසාදයිං.

4437. පරකම්මායනෙ යුත්තො පුඤ්ඤඤ්ච මෙ න විජ්ජති,
අයං පත්ථොදනො අත්ථි භොජයිස්සාමිමං මුනිං.

4438. පත්ථොදනං ගහෙත්වාන සයම්භුස්ස අදාසහං,
මම නිජ්ඣායමානස්ස පරිභුඤ්ජි තදා මුනි.

4439. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසං අගච්ඡහං.

4440. ඡත්තිංසක්ඛත්තුං දෙවින්දො දෙවෙරජ්ජමකාරයිං,
තෙත්තිංසක්ඛත්තුං රාජා ච චක්කවත්තී අහොසහං.

4441. පදෙසරජ්ජං විපුලං ගණනාතො අසඞ්ඛියං,
සුඛිතො යසවා හොමි පත්ථොදනස්සිදං ඵලං.

4442. භවාභවෙ සංසරන්තො ලභාමි අමිතං ධනං,
භොගෙ මෙ ඌනතා නත්ථි පත්ථොදනස්සිදං ඵලං.

4443. නදීසොතපටිභාගා භොගා නිබ්බත්තරෙ මම,
පරිමෙතුං න සක්කොමි පත්ථොදනස්සිදං ඵලං.

4444. ඉමං ඛාද ඉමං භුඤ්ජ ඉමම්හි සයනෙ සය,
තෙනාහං සුඛිතො හොමි පත්ථොදනස්සිදං ඵලං.

4445. චතුනවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි පත්ථොදනස්සිදං ඵලං.

4446. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

4447. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

4448. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

4449. පරිනිබ්බුතෙ කාරුණිකෙ සිද්ධත්ථෙ ලොකනායකෙ,
විත්ථාරිතෙ පාවචනෙ දෙවමානුසසක්කතෙ.

4450. චණ්ඩාලො ආසහං තත්ථ ආසන්දිපීඨකාරකො,
තෙන කම්මෙන ජීවාමි තෙන පොසෙමි දාරකෙ.

4451. ආසන්දිං සුකතං කත්වා පසන්නො සෙහි පාණිහි,
සයමෙවුපගන්ත්වාන භික්ඛුසඞ්ඝස්ස’දාසහං.

4452. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

4453. දෙවලොකගතො සන්තො මොදාමි තිදසඞ්ගණෙ,
සයනානි මහග්ඝානි නිබ්බත්තන්ති යදිච්ඡකං.

4454. පඤ්ඤාසක්ඛත්තුං දෙවින්දො දෙවරජ්ජමකාරයිං,
අසීතික්ඛත්තුං රාජා ච චක්කවත්තී අහොසහං.