4299. චන්දභාගානදීතීරෙ අස්සමො සුකතො මම,
සුසුද්ධපුලිනාකිණ්ණා පණ්ණසාලා සුමාපිතා.

4300. උත්තානකූලා නදිකා සුපතිත්ථා මනොරමා,
මච්ඡකච්ඡපසම්පන්නා සුසුමාරනිසෙවිතා.

4301. අච්ඡා මයූරා දීපී ච කරවීකා ච සාලිකා,
කූජන්ති සබ්බදා එතෙ සොභයන්තා මම’ස්සමං.

4302. කොකිලා මඤ්ජුභාණී ච හංසා ච මධුරස්සරා,
අභිකූජන්ති තෙ තත්ථ සොභයන්තා මමස්සමං.

4303. සීහා ව්යග්ඝා වරාහා ච චකා කොකතරච්ඡකා,
ගිරිදුග්ගම්හි නාදෙන්ති සොභයන්තා මමස්සමං.

4304. එණීමිගා ච සරභා භෙරණ්ඩා සූකරා බහූ,
ගිරිදුග්ගම්හි නාදෙන්ති සොභයන්තා මමස්සමං.

4305. උද්දාලකා චම්පකා ච පාටලී සින්දුවාරකා,
අතිමුත්තා අසොකා ච පුප්ඵන්ති මම අස්සමෙ.

4306. අඞ්කොලා යූථිකා චෙව සත්තලී බිම්බිජාලිකා,
කණ්ණිකා කණිකාරා ච පුප්ඵන්ති මම අස්සමෙ.

4307. නාගා සාලා ච සළලා පුණ්ඩරීකෙත්ථ පුප්ඵිතා,
දිබ්බගන්ධං සම්පවන්තා සොභයන්ති මමස්සමං.

4308. අජ්ජුනා අසනා චෙත්ථ මහානාමා ච පුප්ඵිතා,
සාලා ච කඞ්ගුපුප්ඵා ච සොභන්ති මමස්සමං.

4309. අම්බා ජම්බූ ච තිලකා නිම්බා ච සාලකල්යාණී,
දිබ්බගන්ධං සම්පවන්තා සොභයන්ති මමස්සමං.

4310. අසොකා ච කපිත්ථා ච භගිනිමාලෙත්ථ පුප්ඵිතා,
දිබ්බගන්ධං සම්පවන්තා සොභයන්ති මමස්සමං.

4311. කදම්බා කදලී චෙව ඉසිමුග්ගා ච රොපිතා,
ධුවං ඵලානි ධාරෙන්ති සොභයන්තා මමස්සමං.

4312. හරීතකා ආමලකා අම්බා ජම්බූ විභීතකා,
කොලා භල්ලාතකා බිල්ලා ඵලිනො මම අස්සමෙ,

4313. අවිදූරෙ පොක්ඛරණී සුපතිත්ථා මනොරමා,
මන්දාලකෙහි සඤ්ඡන්නා පදුමුප්පලකෙහි ච.

4314. ගබ්භං ගණ්හන්ති පදුමා අඤ්ඤෙ පුප්ඵන්ති කෙසරී,
ඔපත්තකණ්ණිකා චෙව පුප්ඵන්ති මම අස්සමෙ.

4315. පාඨීනා පාවුසා මච්ඡා වලජා මුඤ්ජරොහිතා,
අච්ඡොදකම්හි විචරං සොභයන්ති මමස්සමං.

4316. නයිතා අම්බගන්ධී ච අනුකූලෙ ච කෙතකා,
දිබ්බගන්ධං සම්පවන්තා සොභයන්ති මමස්සමං.

4317. මධූ භිසම්හා සවති ඛීරසප්පි මුලාළිහි,
දිබ්බගන්ධං සම්පවන්තා සොභයන්ති මමස්සමං.

4318. පුලිනා සොභනා තත්ථ ආකිණ්ණා ජලසෙවිතා,
ඔපුප්ඵා පුප්ඵිතා සෙන්ති සොභයන්තා මමස්සමං.

4319. ජටාභාරෙන භරිතා අජිනුත්තරවාසනා,
වාකචීරධරා සබ්බෙ සොභයන්ති මමස්සමං.

4320. යුගමත්තමපෙක්ඛන්තා නිපකා සන්තවුත්තිනො,
කාමභොගෙ අනපෙක්ඛා වසන්ති මම අස්සමෙ.