4072. පබ්භාරකූටං නිස්සාය අනොමො නාම තාපසො,
අස්සමං සුකතං කත්වා පණ්ණසාලෙ වසී තදා.

4073. සිද්ධං තස්ස තපොකම්මං සිද්ධිපත්තො සකෙ බලෙ,
සකසාමඤ්ඤවික්කන්තො ආතාපී නිපකො මුනි.

4074. විසාරදො සසමයෙ පරවාදෙ ච කොවිදො,
පට්ඨො භූමන්තලික්ඛම්හි උප්පාතම්හි ච කොවිදො.

4075. වීතසොකො නිරාරම්භො අප්පාහාරො අලොලුපො,
ලාභාලාභෙන සන්තුට්ඨො ඣායී ඣානරතො මුනි.

4076. පියදස්සී නාම සම්බුද්ධො අග්ගො කාරුණිකො මුනි,
සත්තෙ තාරෙතුකාමො සො කරුණාය ඵරී තදා.

4077. බොධනෙය්යං ජනං දිස්වා පියදස්සී මහාමුනි,
චක්කවාළසහස්සම්පි ගන්ත්වා ඔවදතෙ මුනි.

4078. මමුද්ධරිතුකාමො සො මමස්සමමුපාගමි,
න දිට්ඨො මෙ ජිනො පුබ්බෙ න සුතො පි ච කස්ස චි.

4079. උප්පාතා සුපිනා මය්හං ලක්ඛණා සුප්පකාසිතා,
පට්ඨො භූමන්තලික්ඛම්හි නක්ඛත්තපදකොවිදො.

4080. සො’හං බුද්ධස්ස සුත්වාන තත්ථ චිත්තං පසාදයිං,
භුඤ්ජන්තො වා නිසින්නො වා සරාමි නිච්චකාලිකං.

4081. මයි එවං සරන්තම්හි භගවාපි අනුස්සරි,
බුද්ධං අනුස්සරන්තස්ස පීති මෙ හොති තාවදෙ.

4082. කාලඤ්ච පුනරාගම්ම උපෙසි මං මහාමුනි,
සම්පත්තෙපි න ජානාමි අයං බුද්ධො මහාමුනි.

4083. අනුකම්පකො කාරුණිකො පියදස්සී මහාමුනි,
සඤ්ජානාපෙසි අත්තානං අහං බුද්ධො සදෙවකෙ.

4084. සඤ්ජානිත්වාන සම්බුද්ධං පියදස්සිං මහාමුනිං
සකං චිත්තං පසාදෙත්වං ඉදං වචනමබ්රවිං:

4085. “අඤ්ඤෙ පීඨෙ ච පල්ලඞ්කෙ ආසන්දීසු නිසීදරෙ,
තුවම්පි සබ්බදස්සාවී නිසීදි රතනාසනෙ”

4086. සබ්බරතනමයං පීඨං නිම්මිනිත්වාන තාවදෙ,
පියදස්සිස්ස මුනිනො අදාසිං ඉද්ධිනිම්මිතං.

4087. රතනෙ ච නිසින්නස්ස පීඨකෙ ඉද්ධිනිම්මිතෙ,
කුම්භමත්තං ජම්බුඵලං අදාසිං තාවදෙ අහං.

4088. මම හාසං ජනෙත්වාන පරිභුඤ්ජි මහාමුනි,
තදා චිත්තං පසාදෙත්වා සත්ථාරම්හිවාදයිං.

4089. පියදස්සී තු භගවා ලොකජෙට්ඨො නරාසභො,
රතනාසනමාසීනො ඉමා ගාථා අභාසථ:

4090. “යො මෙ රතනමයං පීඨං අමතං ච ඵලං අදා,
තමහං කිත්තයිස්සාමි සුණාථ මම භාසතො.

4091. සත්තසත්තති කප්පානි දෙවලොකෙ රමිස්සති,
පඤ්චසත්තතික්ඛත්තුඤ්ච චක්කවත්තී භවිස්සති.

4092. ද්වත්තිංසක්ඛත්තුං දෙවින්දො දෙවරජ්ජං කරිස්සති,
පදෙසරජ්ජං විපුලං ගණනාතො අසංඛියං.

4093. සොණ්ණමයං රූපිමයං පල්ලඞ්කං සුකතං බහුං,
ලොහිතඞ්කමයං චෙව ලච්ඡති රතනාමයං.