3891. පබ්භාරකූටං නිස්සාය සොභිතො නාම තාපසො,
පවත්තඵලං භුඤ්ජිත්වා වසතී පබ්බතන්තරෙ.

3892. අග්ගිං දාරුං ආහරිත්වා උජ්ජාලෙසිං අහං තදා,
උත්තමත්ථං ගවෙසන්තො බ්රහ්මලොකූපපත්තියා.

3893. පදුමුත්තරො ලොකවිදූ ආහුතීනං පටිග්ගහො,
මමුද්ධරිතුකාමො සො ආගච්ඡි මම සන්තිකෙ.

3894. “කිං කරොසි මහාපුඤ්ඤ දෙහි මෙ අග්ගිදාරුකං,
අහමග්ගිං පරිචරෙ තතො මෙ සුද්ධි හෙහිති.”

3895. “සුභද්දකො ත්වං මනුජෙ දෙවතෙ ත්වං පජානසි,
තුවමග්ගිං පරිචර හන්ද තෙ අග්ගිදාරුකං.”

3896. තතො කට්ඨං ගහෙත්වාන අග්ගිං උජ්ජාලයී ජිනො,
න තත්ථ කට්ඨං පජ්ඣායි පාටිහීරං මහෙසිනො.

3897. “න තෙ අග්ගි පජ්ජලති ආහුතී තෙ න විජ්ජති,
නිරත්ථකං වතං තුය්හං අග්ගිං පරිචරස්සු මෙ.”

3898. “කීදිසො සො මහාවීර අග්ගි තව පවුච්චති,
මහම්පි කථයස්සෙ’තං උභො පරිචරාමසෙ.”

3899. “හෙතුධම්මනිරොධාය කිලෙසසමනාය ච,
ඉස්සා මච්ඡරියං හිත්වා තයො එතෙ මමා’හුතී.”

3900. “කීදිසො ත්වං මහාවීර කථං ගොත්තො’සි මාරිස,
ආචාරපටිපත්තී තෙ බාළ්හං ඛො මම රුච්චතී.”

3901. “ඛත්තියම්භි කුලෙ ජාතො අභිඤ්ඤා පාරමිං ගතො,
සබ්බාසවපරික්ඛීණො නත්ථිදානි පුනබ්භවො.”

3902. “යදි බුද්ධොසි සබ්බඤ්ඤූ පභඞ්කර තමොනුද,
නමස්සිස්සාමි තං දෙව දුක්ඛස්සන්තකරො තුවං”

3903. පත්ථරිත්වා, ජිනචම්මං නිසීදන මදාසහං,
නිසීද නාථ සබ්බඤ්ඤූ උපට්ඨිස්සාමහං තුවං.

3904. නිසීදි භගවා තත්ථ අජිනම්හි සුවිත්ථතෙ,
නිමන්තයිත්වා සම්බුද්ධං පබ්බතං අගමාසහං.

3905. ඛාරිභාරඤ්ච පූරෙත්වා තින්දුකඵලමාහරිං,
මධුනා යොජයිත්වාන ඵලං බුද්ධස්ස’ දාසහං.

3906. මම නිජ්ඣායමානස්ස පරිභුඤ්ජි තදා ජිනො,
තත්ථ චිත්තං පසාදෙසිං පෙක්ඛන්තො ලොකනායකං.

3907. පදුමුත්තරො ලොකවිදූ ආහුතීනං පටිග්ගහො,
මම’ස්සමෙ නිසීදිත්වා ඉමා ගාථා අභාසථ:

3908. “යො මං ඵලෙන තප්පෙසි පසන්නො සෙහි පාණිහි,
තමහං කිත්තයිස්සාමි සුණාථ මම භාසතො.

3909. පඤ්චවීසතික්ඛත්තුං සො දෙවරජ්ජං කරිස්සති,
සහස්සක්ඛත්තුං රාජා ච චක්කවත්තී භවිස්සති.

3910. තස්ස සඞ්කප්පමඤ්ඤාය පුබ්බකම්මසමඞ්ගිනො,
අන්නං පානඤ්ච වත්ථඤ්ච සයනඤ්ච මහාරහං.

3911. පුඤ්ඤකම්මෙන සංයුත්තා නිබ්බත්තිස්සන්ති තාවදෙ,
සදා පමුදිතො චායං භවිස්සති අනාමයො.

3912. උපපජ්ජති යං යොනිං දෙවත්තං අථ මානුසං,
සබ්බත්ථ සුඛිතො හුත්වා මනුස්සත්තං ගමිස්සති.

3913. අජ්ඣායකො මන්තධරො තිණ්ණං වෙදානපාරගු,
සම්බුද්ධමුපගන්ත්වාන අරහා සො භවිස්සති.”