3706. සින්ධුයා නදියා තීරෙ සුකතො අස්සමො මම,
තත්ථ වාචෙමහං සිස්සෙ ඉතිහාසං සලක්ඛණං.

3707. ධම්මකාමා විනීතා තෙ සොතුකාමා සුසාසනං,
ඡළඞ්ගෙ පාරමිප්පත්තා සින්ධුකූලෙ වසන්ති තෙ.

3708. උප්පාතගමනෙ චෙව ලක්ඛණෙසු ච කොවිදා,
උත්තමත්ථං ගවෙසන්තා වසන්ති පවනෙ තදා.

3709. සුමෙධො නාම සම්බුද්ධො ලොකෙ උප්පජ්ජි තාවදො,
අම්හාකං අනුකම්පන්තො උපගච්ඡි විනායකො.

3710. උපාගතං මහාවීරං සුමෙධං ලොකනායකං,
තිණසන්ථාරකං කත්වා ලොකජෙට්ඨස්ස’දාසහං.

3711. පවනාතො මධුං ගය්හ බුද්ධසෙට්ඨස්ස’දාසහං,
සම්බුද්ධො පරිභුඤ්ජිත්වා ඉදං වචනමබ්රවි:

3712. “යො තං අදාසි මධුං මෙ පසන්නො සෙහි පාණිහි,
තමහං කිත්තසිස්සාමි සුණාථ මම භාසතො.

3713. ඉමිනා මධුදානෙන තිණසන්ථාරකෙන ච,
තිංසකප්පසහස්සානි දෙවලොකෙ රමිස්සති.

3714. තිංසකප්පසහස්සම්හි ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

3715. තස්ස ධම්මෙසු දායාදො ඔරසො ධම්මනිම්මිතො,
සබ්බාසවෙ පරිඤ්ඤාය නිබ්බායිස්සත’නාසවො.

3716. දෙවලොකා ඉධාගන්ත්වා මාතුකුච්ඡිං උපාගතෙ,
මධුවස්සං පවස්සිත්ථ ඡාදයං මධුනා මහිං.

3717. මයි නික්ඛන්තමත්තම්හි කුච්ඡියා ච සුදුත්තරං,
තත්රාපි මධුවස්සං මෙ වස්සතෙ නිච්චකාලිකං.

3718. අගාරා අභිනික්ඛම්ම පබ්බජිං අනගාරියං,
ලාභී අන්නස්ස පානස්ස මධුදානස්සි’දං ඵලං.

3719. සබ්බකාමසමිද්ධො’හං භවිත්වා දෙවමානුසෙ,
තෙනෙව මධුදානෙන පත්තොම්හි ආසවක්ඛයං.

3720. වුට්ඨම්හි දෙවෙ චතුරඞ්ගුලෙ තිණෙ
සම්පුප්ඵිතෙ ධරණිරුහෙ සඤ්ඡන්නෙ,
සුඤ්ඤෙ ඝරෙ මණ්ඩපරුක්ඛමූලෙ,
වසාමි නිච්චං සුඛිතො අනාසවො.

3721. මජ්ඣෙ මහන්තෙ හීනෙ ච භවෙ සබ්බෙ අතික්කමිං,
අජ්ජ මෙ ආසවා ඛීණා නත්ථිදානි පුනබ්භවො.

3722. තිංසකප්පසහස්සම්හි යං දානමදදිං තදා,
දුග්ගතිං නාභිජානාමි මධුදාන’ස්සිදං ඵලං.

3723. කිලෙසා ඣාපිතා මය්හං භවා සබ්බෙ සමූහතා,
සබ්බාසවා පරික්ඛීණා නත්ථිදානි පුනබ්භවො.

3724. ස්වාගතං වත මෙ ආසි මම බුද්ධස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

3725. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.