3374. නගරෙ හංසවතියා ආසිං දොවාරිකො අහං,
අක්ඛොභං අමිතං භොගං ඝරෙ සන්නිචිතං මම.

3375. රහො ගතො නිසීදිත්වා සම්පහංසිත්ව මානසං,
නිසජ්ජ පාසාදවරෙ එවං චින්තෙසහං තදා.

3376. බහූ මෙ’ධිගතා භොගා ඵීතං අන්තෙපුරං මම,
රාජාපි සන්නිමන්තෙසි ආනන්දො පඨවිස්සරො.

3377. අයඤ්ච බුද්ධො උප්පන්නො අධිච්චුප්පත්තිකො මුනි,
සංවිජ්ජන්ති ච මෙ භොගා දානං දස්සාමි සත්ථුනො.

3378. පදුමෙන රාජපුත්තෙන දින්නං දානවරං ජිනෙ,
හත්ථිනාගෙ ච පල්ලඞ්කෙ අපස්සෙනඤ්ච’නප්පකං.

3379. අහම්පි දානං දස්සාමි සඞ්ඝෙ ගණවරුත්තමෙ,
අදින්නපුබ්බමඤ්ඤෙසං භවිස්සං ආදිකම්මිකො.

3380. චින්තෙත්වාහං බහුවිධං යාගෙ යස්ස සුඛං ඵලං,
පරික්ඛාරදානමද්දක්ඛිං මම සඞ්කප්පපූරණං.

3381. පරික්ඛාරානි දස්සාමි සඞ්ඝෙ ගණවරුත්තමෙ,
අදින්නපුබ්බමඤ්ඤෙසං භවිස්සං ආදිකම්මිකො.

3382. නළකාරෙ උපාගම්ම ඡත්තං කාරෙසිං තාවදෙ,
ඡත්තසතසහස්සානි එකතො සන්නිපාතයිං.

3383. දුස්සසතසහස්සානි එකතො සන්නිපාතයිං,
පත්තසතසහස්සානි එකතො සන්නිපාතයිං.

3384. වාසියො සත්ථකෙ චාපි සූචියො නඛඡෙකෙ,
හෙට්ඨා ඡත්තෙ ලග්ගාපෙසිං කාරෙත්වා තදනුච්ඡවෙ.

3385. විධූපනෙ තාලවණෙට මොරහත්ථෙ ච චාමරෙ,
පරිස්සාවනෙ තෙලධරෙ කාරයිං තදනුච්ඡවෙ.

3386. සූචිඝරෙ අංසබන්ධෙ අථොපි කායබන්ධනෙ,
ආධාරකෙ ච සුකතෙ කාරයිං තදනුච්ඡවෙ.

3387. පරිභොගභාජනෙ ච අථොපි ලොහථාලකෙ,
භෙසජ්ජෙ පූරයිත්වාන හෙට්ඨාඡත්තෙ ඨපෙසහං.

3388. වචං උසීරං ලට්ඨිමධුං පිප්ඵලී මරිචානි ච,
හරීතකිං සිඞ්ගිවෙරං සබ්බං පූරෙසිං භාජනෙ.

3389. උපාහනෙ පාදුකායො අථො උදකපුඤ්ඡනෙ,
කත්තරදණ්ඩෙ සුකතෙ කාරයිං තදනුච්ඡවෙ.

3390. ඔසධඤ්ජනනාළී ච සලාකා ධම්මකුත්තරා,
කුඤ්චිකා පඤ්චවණ්ණෙහි සිබ්බිතෙ කුඤ්චිකාඝරෙ.

3391. ආයොගෙ ධූමනෙත්තෙ ච අථොපි දීපධාරකෙ,
තුම්බකෙ ච කරණ්ඩෙ ච කාරයිං තදනුච්ඡවෙ.