1110. සිද්ධත්ථස්ස භගවතො ථූපසෙට්ඨස්ස සම්මුඛා,
විචිත්තදුස්සෙ ලග්ගෙත්වා කප්පරුක්ඛං ඨපෙස’හං.

1111. යං යං යො’නුපපජ්ජාමි දෙවත්තං අථ මානුසං,
සොභයන්තො මම ද්වාරං කප්පරුක්ඛො’පතිට්ඨති.

1112. අහඤ්ච පරිසා චෙව යෙ කෙචි මම නිස්සිතා,
තම්හා දුස්සං ගහෙත්වාන නිවාසෙම මයං සදා.

1113. චතුනවුතෙ ඉතො කප්පෙ යං රුක්ඛං ඨපයිං තදා,
දුග්ගතිං නාභිජානාමි කප්පරුක්ඛස්සි’දං ඵලං.

1114. ඉතො ච සත්තමො කප්පෙ සුචෙළා අට්ඨ ඛත්තියා,
සත්තරතනසම්පන්නා චක්කවත්තී මහබ්බලා.

1115. පටිසම්භිදා -පෙ- බුද්ධස්ස සාසනං.

කුණ්ඩ - සාගත - කච්චානා උදායී මොඝරාජකො,
අධිමුත්තො ලසුණදො ආයාගී ධම්මචක්කිකො,
කප්පරුක්ඛී ච දසමො ගාථායො ද්වාදස සතන්ති.