3320. අජ්ජුනො නාම සම්බුද්ධො හිමවන්තෙ වසී තදා,
චරණෙන ච සම්පන්නො සමාධිකුසලො මුනි.

3321. කුම්භමත්තං ගහෙත්වාන පනසං ජීවජීවකං,
ඡත්තපණ්ණෙ ඨපෙත්වාන අදාසිං සත්ථුනො අහං.

3322. එකනවුතෙ ඉතො කප්පෙ යං ඵලමදදිං තදා,
දුග්ගතිං නාභිජානාමි ඵලදානස්සිදං ඵලං.

3323. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

3324. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

3325. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3326. විපස්සිනො පාවචනෙ එකං ලෙණං මයා කතං,
චාතුද්දිසස්ස සඞ්ඝස්ස බන්ධුමාරාජධානියා.

3327. දුස්සෙහි භූමිං ලෙණස්ස සන්ථරිත්වා පරිච්චජිං,
උදග්ගචිත්තො සුමනො අකාසිං පණිධිං තදා.

3328. ආරාධයෙය්යං සම්බුද්ධං පබ්බජ්ජඤ්ච ලභෙය්යහං,
අනුත්තරඤ්ච නිබ්බානං ඵුසෙය්යං සන්තිමුත්තමං.

3329. තෙනෙව සුක්කමූලෙන කප්පං නවුති සංසරිං,
දෙවභූතො මනුස්සො වා කතපුඤ්ඤො විරොචහං.

3330. තතො කම්මාවසෙසෙන ඉධ පච්ඡිමකෙ භවෙ,
චම්පායං අග්ගසෙට්ඨිස්ස ජාතොම්හි එකපුත්තකො.

3331. ජාතමත්තස්ස මෙ සුත්වා පිතු ඡන්දො අයං අහු,
දදාමහං කුමාරස්ස වීසකොටි අනූනකා.

3332. චතුරඞ්ගුලා ච මෙ ලොමා ජාතා පාදතලෙ උභො,
සුඛුමා මුදුසම්ඵස්සා තූලපිචුසමා සුභා.

3333. අතීතා නවුතී කප්පා අයමෙකොව උත්තරි,
නාභිජානාමි නික්ඛිත්තෙ පාදෙ භූම්යා අසන්ථතෙ.

3334. ආරාධිතො මෙ සම්බුද්ධො පබ්බජිං අනගාරියං,
අරහත්තඤ්ච මෙ පත්තං සීතිභූතොම්භි නිබ්බුතො.

3335. අග්ගො ආරද්ධවිරියානං නිද්දිට්ඨො සබ්බදස්සිනා,
ඛීණාසවො ච අරහා ඡළභිඤ්ඤො මහිද්ධිකො.

3336. එකනවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි ලෙනදානස්සිදං ඵලං.

3337. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

3338. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

3339. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3340. ථෙරො කොටිවිසො සොණො භික්ඛුසඞ්ඝස්ස අග්ගතො,
පඤ්චහං පුට්ඨො වියාකාසි අනොතත්තෙ මහාසරෙති.