3341. අනොතත්තසරාසන්තෙ රමණීයෙ සිලාතලෙ,
නානාරතනපජ්ජොතෙ නානාගන්ධවනන්තරෙ.

3342. මහතා භික්ඛුසඞ්ඝෙන පරෙතො ලොකනායකො,
ආසීනො ව්යාකරී තත්ථ පුබ්බකම්මානි අත්තනො.

3343. සුණාථ භික්ඛවො මය්හං යං කම්මං පකතං මයා,
පිලොතිකස්ස කම්මස්ස බුද්ධත්තෙපි විපච්චති.

3344. මුනාළී නාමහං ධුත්තො පුබ්බෙ අඤ්ඤාසු ජාතිසු,
පච්චෙකබුද්ධං සරභුං අබ්භාචික්ඛිං අදූසකං.

3345. තෙන කම්මවිපාකෙන නිරයෙ සංසරිං චිරං,
බහුවස්සසහස්සානි දුක්ඛං වෙදෙසිං වෙදනං.

3346. තෙන කම්මාවසෙසෙන ඉධ පච්ඡිමකෙ භවෙ,
අබ්භක්ඛානං මයා ලද්ධං සුන්දරිකාය කාරණා.

3347. සබ්බාභිභුස්ස බුද්ධස්ස නන්දො නාමාසි සාවකො,
තං අබ්භක්ඛාය නිරයෙ චිරං සංසරිතං මයා.

3348. දසවස්සසහස්සානි නිරයෙ සංසරිං චිරං,
මනුස්සභාවං ලද්ධාහං අබ්භක්ඛානං බහුං ලභිං.

3349. තෙන කම්මාවසෙසෙන චිඤ්චමානවිකා මමං,
අබ්භක්ඛාසි අභූතෙන ජනකායස්ස අග්ගතො.

3350. බ්රාහ්මණො සුතවා ආසිං අහං සක්කතපූජිතො,
මහාවනෙ පඤ්චසතෙ මන්තෙ වාචෙමි මාණවෙ.

3351. තත්ථාගතො ඉසි භීමො පඤ්චාභිඤ්ඤො මහිද්ධිකො,
තඤ්චාහමාගතං දිස්වා අබ්භාචික්ඛිමදූසකං.

3352. තතොහං අවචං සිස්සෙ කාමභොගී අයං ඉසි,
මය්හම්පි භාසමානස්ස අනුමොදිංසු මාණවා.

3353. තතො මාණවකා සබ්බෙ භික්ඛමානා කුලෙ කුලෙ,
මහාජනස්ස ආහංසු කාමභොගී අයං ඉසි.

3354. තෙන කම්මවිපාකෙන පඤ්චභික්ඛුසතා ඉමෙ,
අබ්භක්ඛානං ලභුං සබ්බෙ සුන්දරිකාය කාරණා.

3355. වෙමාතුභාතරං පුබ්බෙ ධනහෙතු හනිං අහං,
පක්ඛිපිං ගිරිදුග්ගස්මිං සිලාය ච අපිංසයිං.

3356. තෙන කම්මවිපාකෙන දෙවදත්තො සීලං ඛිපි,
අඞ්ගුට්ඨං පිංසයී පාදෙ මම පාසාණසක්ඛරා.

3357. පුරෙභං දාරකො හුත්වා කීළමානො මහාපථෙ,
පච්චෙකබුද්ධං දිස්වාන මග්ගෙ සකලිකං ඛිපිං.

3358. තෙන කම්මවිපාකෙන ඉධ පච්ඡිමකෙ භවෙ,
වධත්ථං මං දෙවදත්තො අභිමාරෙ පයොජයි.

3359. හත්ථාරොහො පුරෙ ආසිං පච්චෙකමුනිමුත්තමං,
පිණ්ඩාය විචරන්තං තං ආසාදෙසිං ගජෙනහං.

3360. තෙන කම්මවිපාකෙන භන්තො නාලාගිරී ගජො,
ගිරිබ්බජෙ පුරවරෙ දාරුණො මං උපාගමි.

3361. රාජාහං පත්ථිවො ආසිං සත්තිනා පුරිසං හනිං,
තෙන කම්මවිපාකෙන නිරයෙ පච්චිසං භුසං.

3362. කම්මුනො තස්ස සෙසෙන ඉදානි සකලං මම,
පාදෙ ඡවිං පකොපෙසි න හි කම්මං විනස්සති.

3363. අහං කෙවට්ටගාමස්මිං අහුං කෙවට්ටදාරකො,
මච්ඡකෙ ඝාතිතෙ දිස්වා ජනයිං සොමනස්සකං.

3364. තෙන කම්මවිපාකෙන සීසදුක්ඛං අහූ මම,
සබ්බෙ සක්කා ච හඤ්ඤිංසු යදා හනි විඩූඩභො.

3365. ඵුස්සස්සාහං පාවචනෙ සාවකෙ පරිභාසයිං,
යවං ඛාදථ භුඤ්ජථ මා ච භුඤ්ජථ සාලයො.

3366. තෙන කම්මවිපාකෙන තෙමාසං ඛාදිතං යවං,
නිමන්තිතො බ්රාහ්මණෙන වෙරඤ්ජායං වසිං තදා.

3367. නිබ්බුද්ධෙ වත්තමානම්හි මල්ලපුත්තං නිහෙඨයිං,
තෙන කම්මවිපාකෙන පිට්ඨිදුක්ඛං මමං අහුං.