3153. අක්කන්තඤ්ච පදං දිස්වා සිඛිනො ලොකබන්ධුනො,
එකංසං අජිනං කත්වා පදසෙට්ඨං අවන්දහං.

3154. කොරණ්ඩං පුප්ඵිතං දිස්වා පාදපං ධරණීරුහං,
සකොටකං ගහෙත්වාන පදෙ චක්කමපූජයිං.

3155. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පදපූජායිදං ඵලං.

3156. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3157. කානනං වනමොගය්හ වෙළුං ඡෙත්වානහං තදා,
ආලම්බනං ගහෙත්වාන සඞ්ඝස්ස අදදං අහං.

3158. තෙන චිත්තප්පසාදෙන සුබ්බතෙ අභිවාදිය,
ආලම්බනම්පි දත්වාන පක්කමිං උත්තරාමුඛො.

3159. චතුනවුතෙ ඉතො කප්පෙ යං දණ්ඩමදදිං තදා,
දුග්ගතිං නාභිජානාමි දණ්ඩදානස්සිදං ඵලං.

3160. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3161. සතරංසී නාම සම්බුද්ධො සයම්භූ අපරාජිතො,
වුට්ඨහිත්වා සමාධිම්හා භික්ඛාය මං උපාගමි.

3162. පච්චෙකබුද්ධං දිස්වාන අම්බයාගුං අදාසහං,
විප්පසන්නමනං තස්ස විප්පසන්නෙන චෙතසා.

3163. චතුනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි අම්බයාගුයිදං ඵලං.

3164. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3165. දිවාවිහාරා නික්ඛන්තො විපස්සී ලොකනායකො,
භික්ඛාය විචරන්තො සො මම සන්තිකමුපාගමි.

3166. කතො පතීතො සුමනො බුද්ධසෙට්ඨස්ස තාදිනො,
ලොණසුපුටකං දත්වා කප්පං සග්ගම්හි මොදහං.

3167. එකනවුතෙ ඉතො කප්පෙ යං සුපුටකමදාසහං,
දුග්ගතිං නාභිජානාමි පුටකස්ස ඉදං ඵලං.

3168. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.