3121. හිමවන්තස්ස අවිදූරෙ ලම්බකො නාම පබ්බතො,
උපතිස්සො නාම සම්බුද්ධො අබ්භොකාසම්භී චඞ්කමි.

3122. මිගලුද්දො තදා ආසිං අරඤ්ඤෙ කානනෙ අහං,
දිස්වාන තං දෙවදෙවං සයම්භුං අපරාජිතං.

3123. විප්පසන්නෙන චිත්තෙන තදා තස්ස මහෙසිනො,
නිසීදනත්ථං බුද්ධස්ස තිණමුට්ඨිමදාසහං.

3124. දත්වාන දෙවදෙවස්ස භිය්යො චිත්තං පසාදයිං,
සම්බුද්ධමභිවාදෙත්වා සක්කාමිං උත්තරාමුඛො.

3125. අචිරං ගතමත්තං මං මිගරාජා අහෙඨයී,
සීහෙන පාතිතො සන්තො තත්ථ කාලකතො අහං.

3126. ආසන්නෙ මෙ කතං කම්මං බුද්ධසෙට්ඨෙ අනාසවෙ,
සුමුත්තො සරවෙගොව දෙවලොකමගච්ඡහං.

3127. යූපො තත්ථ සුභො ආසි පුඤ්ඤකම්මාභිනිම්මිතො,
සහස්සකණ්ඩො සතභෙණ්ඩු ධජාලූ හරිතාමයො.

3128. පභා නිද්ධාවතෙ තස්ස සතරංසීව උග්ගතො,
ආකිණ්ණො දෙවකඤ්ඤාහි ආමොදිං කාමකාමහං.

3129. දෙවලොකා චවිත්වාන සුක්කමූලෙන චොදිතො,
ආගන්ත්වාන මනුස්සත්තං පත්තොම්හි ආසවක්ඛයං.

3130. චතුනවුතෙ ඉතො කප්පෙ නිසීදනමදාසහං,
දුග්ගතිං නාභිජානාමි තිණමුට්ඨිස්සිදං ඵලං.

3131. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3132. කණිකාරංව ජොතන්තං නිසින්නං පබ්බතන්තරෙ,
අද්දසං විරජං බුද්ධං ඔඝතිණ්ණමනාසවං.

3133. තින්දුකං සඵලං දිස්වා භින්දිත්වාන සකොටකං,
පසන්නචිත්තො සුමනො වෙස්සභුස්ස අදාසහං.

3134. එකනවුතෙ ඉතො කප්පෙ යං ඵලමදදිං තදා,
දුග්ගතිං නාභිජානාමි ඵලදානස්සිදං ඵලං.

3135. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3136. රෙවතො නාම සම්බුද්ධො නදීකූලෙ වසී තදා,
අද්දසං විරජං බුද්ධං පීතරංසිංව භානුමං.

3137. උක්කාමුඛපහට්ඨංව ඛදිරඞ්ගාරසන්නිභං,
ඔසධිංව විරොචන්තං එකඤ්ජලිමකාසභං.

3138. චතුනවුතෙ ඉතො කප්පෙ යමඤ්ජලිමකාසහං,
දුග්ගතිං නාභිජානාමි අඤ්ජලියා ඉදං ඵලං.

3139. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

පදුමී උප්පලමාලී ධජො කිඞ්කිණිකො නළො
චම්පකො පදුමො මුට්ඨි තින්දුකෙකඤ්ජලී තථා
ඡ ච සට්ඨි ච ගාථායො ගණිතායො විභාවිහි.