3084. චන්දභාගානදීතීරෙ අහොසිං වානරො තදා,
අද්දසං විරජං බුද්ධං නිසින්නං පබ්බතන්තරෙ.

3085. ඔභාසෙන්තං දිසා සබ්බා සාලරාජංව ඵුල්ලිතං,
ලක්ඛණබ්යඤ්ජනූපෙතං දිස්වා අත්තමනො අහුං.

3086. උදග්ගචිත්තො සුමනො පීතියා හට්ඨමානසො,
තීණි උප්පලපුප්ඵානි මත්ථකෙ අභිරොපයිං.

3087. පුප්ඵානි අභිරොපෙත්වා විපස්සිස්ස මහෙසිනො,
සගාරවො ගමිත්වාන පක්කමිං උත්තරාමුඛො.

3088. ගච්ඡන්තො පතිකුටිකො විප්පසන්නෙන චෙතසා,
සෙලන්නරෙ පතිත්වාන පාපුණිං ජීවිතක්ඛයං.

3089. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසං අගච්ඡහං.

3090. සතානං තීණික්ඛත්තුඤ්ච දෙවරජ්ජමකාරයිං,
සතානං පඤ්චක්ඛත්තුඤ්ච චක්කවත්තී අහොසහං.

3091. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

3092. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3093. තිස්සො නාම අහූ සත්ථා ලොකජෙට්ඨො නරාසභො,
තස්සොපධික්ඛයෙ දිස්වා ධජමාරොපිතං මයා.

3094. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

3095. සතානං තීණික්ඛත්තුඤ්ච දෙවරජ්ජමකාරයිං,
සතානං පඤ්චක්ඛත්තුඤ්ච චක්කවත්තී අහොසහං.

3096. පදෙසරජ්ජං විපුලං ගණනාතො අසඞ්ඛියං,
අනුභොමි සකං කම්මං පුබ්බෙ සුකතමත්තනො.

3097. ද්වෙනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි ධජදානස්සිදං ඵලං.

3098. ඉච්ඡමානො’වහං අජ්ජ සකානනං සපබ්බතං,
ඛොමදුස්සෙන ඡාදෙය්යං තදා මය්හං කතෙ ඵලං.

3099. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3100. හිමවන්තස්සාවිදූරෙ භූතගණො නාම පබ්බතො,
තත්ථද්දසං පංසුකූලං දුමග්ගම්හි විලග්ගිතං.

3101. තීණි කිඞ්කිණිපුප්ඵානි ඔචිනිත්වා අහං තදා,
හට්ඨො හට්ඨෙන චිත්තෙන පංසුකූලමපූජයිං.

3102. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි තිණ්ණං පුප්ඵානිදං ඵලං.

3103. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

3104. හිමවන්තස්ස අවිදූරෙ හාරිතො නාම පබ්බතො,
සයම්භූ නාරදො රුක්ඛමූලෙ වසී තදා.

3105. නළාගාරං කරිත්වාන තිණෙන ඡාදයිං අහං,
චඞ්කමං සොධයිත්වාන සයම්භුස්ස අදාසහං.

3106. චතුද්දසසු කප්පෙසු දෙවලොකෙ රමිං අහං,
චතුසත්තතික්ඛත්තුඤ්ච දෙවරජ්ජමකාරයිං.