2821. උසභං පවරං වීරං මහෙසිං විජිතාවිනං,
විපස්සිනං මහාවීරං අභිජාතංව කෙසරිං.

2822. රථියං පටිපජ්ජන්තං ආහුතීනං පටිග්ගහං,
ගහෙත්වා කුමුදං මාලං බුද්ධසෙට්ඨං සමොකිරිං.

2823. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2824. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

ආරක්ඛදො භොජනදො ගතසඤ්ඤී පදුමියො,
පුප්ඵාසනි සන්ථවිකො සද්දසඤ්ඤී තිරංසිකො
කන්දලිකො කුමුදී ච සත්තපඤ්ඤාස ගාථකා.