2740. නමො තෙ බුද්ධවීරත්ථු විප්පමුත්තොසි සබ්බධි,
ව්යසනං හි අනුප්පත්තො තස්ස මෙ සරණං භව.

2741. සිද්ධත්ථො තස්ස ව්යාකාසි ලොකෙ අප්පටිපුග්ගලො,
මහොදධිසමො සඞ්ඝො අප්පමෙය්යො අනුත්තරො.

2742. තත්ථ ත්වං විරජෙ ඛෙත්තෙ අනන්තඵලදායකෙ,
සඞ්ඝො චිත්තං පසාදෙහි සුබීජං වාපි රොපය.

2743. ඉදං වත්වාන සබ්බඤ්ඤූ ලොකජෙට්ඨො නරාසභො,
මමෙවං අනුසාසිත්වා වෙහාසං නභමුග්ගමි.

2744. අචිරං ගතමත්තම්හි සබ්බඤ්ඤුම්හි නරාසභෙ,
මරණං සමනුප්පත්තො තුසිතං උපපජ්ජහං.

2745. තදාහං විරජෙ ඛෙත්තෙ අනන්තඵලදායකෙ,
සඞ්ඝෙ චිත්තං පසාදෙත්වා කප්පං සග්ගම්හි මොදහං.

2746. චතුනවුතෙ ඉතො කප්පෙ පසාදමලභිං තදා,
දුග්ගතිං නාභිජානාමි පසාදස්ස ඉදං ඵලං.

2747. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2748. සිද්ධත්ථස්ස භගවතො ආරාමො රොපිතො මයා,
සන්දච්ඡායෙසු රුක්ඛෙසු උපසන්තෙසු පක්ඛිසු.

2749. අද්දසං විරජං බුද්ධං ආහුතීනං පටිග්ගහං,
ආරාමං අතිනාමෙසිං ලොකජෙට්ඨං නරාසභං.

2750. හට්ඨො හට්ඨෙන චිත්තෙන ඵලං පුප්ඵඤ්චදාසහං,
තතො ජාතප්පසාදො ච තං වනං පරිණාමයිං.

2751. බුද්ධස්ස යමිදං දාසිං විප්පසන්නෙන චෙතසා,
භවෙ නිබ්බත්තමානම්හි නිබ්බත්තති ඵලං මම.

2752. චතුනවුතෙ ඉතො කප්පෙ යමාරාමං දදිං තදා,
දුග්ගතිං නාභිජානාමි ආරාමස්ස ඉදං ඵලං.

2753. සත්තතිංසෙ ඉතො කප්පෙ සත්තාසුං මුදුසීතලා,
සත්තරතනසම්පන්නා චක්කවත්තී මහබ්බලා.

2754. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2755. අත්ථදස්සිස්ස මුනිනො අද්දසං සාවකං අහං,
කවකම්මං කරොන්තස්ස සීමාය උපගච්ඡහං.

2756. නිට්ඨිතෙ නවකම්මෙ ච අනුලෙපමදාසහං,
පසන්නචිත්තො සුමනො පුඤ්ඤක්ඛෙත්තෙ අනුත්තරෙ.

2757. අට්ඨාරසෙ කප්පසතෙ යං කම්මමකරිං තදා,
දුග්ගතිං නාභිජානාමි අනුලෙපස්සිදං ඵලං.

2758. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.