2763. පියදස්සිනො භගවතො පබ්භාරො සොධිතො මයා,
ඝටකඤ්ච උපට්ඨාසිං පරිභොගාය තාදිනො.

2764. තං මෙ බුද්ධො වියාකාසි පියදස්සී මහාමුනි,
සහස්සකණ්ඩො සතභෙණ්ඩු ධජාලූ හරිතාමයො.

2765. නිබ්බත්තිස්සති සො යූපො රතනඤ්ච අනප්පකං,
පබ්භාරදානං දත්වාන කප්පං සග්ගම්හි මොදහං.

2766. ඉතො බත්තිංසකප්පම්භි සුසුද්ධො නාම ඛත්තියො,
සත්තරතනසම්පන්නො චක්කවත්තී මහබ්බලො.

2767. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

කෙසරං ගන්ධ මන්නඤ්ච ධම්මසඤ්ඤී ඵලෙන ච,
පසාදාරාමදායී ච ලෙපකො බුද්ධසඤ්ඤකො,
පබ්භාරදො ච ගාථායො එකපඤ්ඤාස කිත්තිතා.

2768. ධම්මදස්සිස්ස මුනිනො වති කාරාපිතා මයා,
ආරක්ඛො ච මයා දින්නො දිපදින්දස්ස තාදිනො.

2769. අට්ඨාරසෙ කප්පසතෙ යං කම්මමකරිං තදා,
තෙන කම්මවිසෙසෙන පත්තො මෙ ආසවක්ඛයො.

2770. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2771. සුජාතො සාලලට්ඨීව සොභඤ්ජනමිවුග්ගතො,
ඉන්දලට්ඨිරිවාකාසෙ විරොචති සදා ජිනො.

2772. තස්ස දෙවාතිදෙවස්ස වෙස්සභුස්ස මහෙසිනො,
අදාසිං භොජනමහං විප්පසන්නෙන චෙතසා.

2773. තං මෙ බුද්ධො අනුමොදි සයම්භූ අපරාජිතො,
‘භවෙ නිබ්බත්තමානම්හි ඵලං නිබ්බත්තතූ තව.’

2774. එකතිංසෙ ඉතො කප්පෙ යං දානමදදිං තදා,
දුග්ගතිං නාභිජානාමි භොජනස්ස ඉදං ඵලං.

2775. පඤ්චවීසෙ ඉතො කප්පෙ එකො ආසිං අමිත්තභො,
සත්තරතනසම්පන්නො චක්කවත්තී මහබ්බලො.

2776. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2777. ආකාසෙ ච පදං නත්ථි අම්බරෙ අනිලඤ්ජසෙ,
සිද්ධත්ථං ජිනමදදක්ඛිං ගච්ඡන්තං තිදිවඞ්ගණෙ.

2778. අනිලෙනෙරිතං දිස්වා සම්මාසම්බුද්ධචීවරං,
විත්ති මෙ තාවදෙ ජාතා දිස්වාන ගමනං මුනෙ.