2582. එකාසනං අහමදං පසන්නො සෙහි පාණිහි,
බිම්බොහනඤ්ච පාදාසිං උත්තමත්ථස්ස පත්තියා.

2583. එකනවුතෙ ඉතො කප්පෙ බිම්බොහනමදාසහං,
දුග්ගතිං නාභිජානාමි බිම්බොහනස්සිදං ඵලං.

2584. ඉතො තෙසට්ඨිමෙ කප්පෙ අසමො නාම ඛත්තියො,
සත්තරතනසම්පන්නො චක්කවත්තී මහබ්බලො.

2585. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2586. මම සඞ්කප්පමඤ්ඤාය සත්ථා ලොකග්ගනායකො,
මනොමයෙන කායෙන ඉද්ධියා උපසඞ්කමි.

2587. සත්ථාරමුපසඞ්කන්තං වන්දිත්වා පුරිසුත්තමං,
පසන්නචිත්තො සුමනො තිලමුට්ඨිමදාසහං.

2588. එකනවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි තිලමුට්ඨ්යා ඉදං ඵලං.

2589. ඉතො සොළසකප්පම්භි නන්දියො නාම ඛත්තියො,
සත්තරතනසම්පන්නො චක්කවත්තී මහබ්බලො.

2590. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2591. මහාසමුද්දං නිස්සාය වසතෙ පබ්බතන්තරෙ,
පච්චුග්ගන්ත්වාන කත්වාන චඞ්ගොටකමදාසහං.

2592. සිද්ධත්ථස්ස මහෙසිනො සබ්බසත්තානුකම්පිනො,
පුප්ඵචඞ්ගොටකං දත්වා කප්පං සග්ගම්හි මොදහං.

2593. චතුනවුතෙ ඉතො කප්පෙ චඞ්ගොටකමදං තදා,
දුග්ගතිං නාභිජානාමි චඞ්ගොටකස්සිදං ඵලං.

2594. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2595. කොණ්ඩඤ්ඤස්ස භගවතො වීතරාගස්ස තාදිනො,
ආකාසසමචිත්තස්ස නිප්පපඤ්චස්ස ඣායිනො.

2596. සබ්බමොහාතිවත්තස්ස සබ්බලොකහිතෙසිනො,
අබ්භඤ්ජනං මයා දින්නං දිපදින්දස්ස සත්ථුනො.

2597. අපරිමෙය්යෙ ඉතො කප්පෙ අබ්භඤ්ජනමදං තදා,
දුග්ගතිං නාභිජානාමි අබ්භඤ්ජනස්සිදං ඵලං.

2598. ඉතො පණ්ණරසෙ කප්පෙ චිරප්පො නාම ඛත්තියො,
සත්තරතනසම්පන්නො චක්කවත්තී මහබ්බලො.

2599. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2600. උදුම්බරෙ වසන්තස්ස නියතෙ පණ්ණසන්ථරෙ,
වුත්ථෙකාසො මයා දින්නො සමණස්ස මහෙසිනො.

2601. තිස්සස්ස දිපදින්දස්ස ලොකනාථස්ස තාදිනො,
අඤ්ජලිං පග්ගහෙත්වාන සන්ථරිං පුප්ඵසන්ථරිං.

2602. ද්වෙනවුතෙ ඉතො කප්පෙ යං කරිං පුප්ඵසන්ථරං,
දුග්ගතිං නාභිජානාමි සන්ථරිස්ස ඉදං ඵලං.