2442. විපස්සිනො භගවතො බොධියා පාදපුත්තමෙ,
පසන්නචිත්තො සුමනො කාරෙසිං වෙදිකං අහං.

2443. එකනවුතෙ ඉතො කප්පෙ කරොසිං වෙදිකං අහං,
දුග්ගතිං නාභිජානාමි වෙදිකාය ඉදං ඵලං.

2444. ඉතො එකාදසෙ කප්පෙ අසොසිං සුරියස්සමො,
සත්තරතනසම්පන්නො චක්කවත්තී මහබ්බලො.

2445. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2446. නගරෙ අරුණවතියා වණ්ණකාරො අහං තදා,
චෙතියෙ දුස්සභණ්ඩානි නානාවණ්ණං රජෙසහං.

2447. එකතිංසෙ ඉතො කප්පෙ යං වණ්ණං රජයිං තදා,
දුග්ගතිං නාභිජානාමි වණ්ණදානස්සිදං ඵලං.

2448. ඉතො තෙවීසතිකප්පෙ චන්දූපමසමානකො,
සත්තරතනසම්පන්නො චක්කවත්තී මහබ්බලො.

2449. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2450. මිගලුද්දො පුරෙ ආසිං අරඤ්ඤෙ කානනෙ අහං,
පියාලං පුප්ඵිතං දිස්වා ගතමග්ගෙ ඛිපිං අහං.

2451. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2452. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2453. සකෙ සිප්පෙ අපත්ථද්ධො අගමං කානනං අහං,
සම්බුද්ධං යන්තං දිස්වාන අම්බයාගං අදාසහං.

2454. එකනවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි අම්බයාගස්සිදං ඵලං.

2455. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.