2411. නිබ්බුතෙ ලොකනාථම්හි සිඛිම්හි වදතං වරෙ,
වටංසකෙහි ආකිණ්ණං බොධිපූජමකාසහං.

2412. එකතිංසෙ ඉතො කප්පෙ යං පූජමකරිං තදා,
දුග්ගතිං නාභිජානාමි බොධිපූජායිදං ඵලං.

2413. ඉතො ඡබ්බීසතිකප්පෙ අහුං මෙඝබ්භ නාමකො,
සත්තරතනසම්පන්නො චක්කවත්තී මහබ්බලො.

2414. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2415. අසිතො නාම නාමෙන මාලාකාරො අහුං තදා,
ආවෙලං පග්ගහෙවොන රඤ්ඤො දාතුං වජාමහං.

2416. අසම්පත්තම්හි රාජානං අද්දසං සිඛිනායකං.
හට්ඨො හට්ඨෙන චිත්තෙන බුද්ධස්ස අභිරොපයිං.

2417. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2418. පඤ්චවීසෙ ඉතො කප්පෙ රාජාහොසිං මහබ්බලො,
වෙභාරො නාම නාමෙන චක්කවත්තී මහබ්බලො.

2419. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2420. උසභං පවරං වීරං වෙස්සභුං විජිතාවිනං,
පසන්නචිත්තො සුමනො බුද්ධසෙට්ඨං අවන්දිහං.

2421. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි වන්දනාය ඉදං ඵලං.

2422. චතුවීසතිකප්පම්හි විගතානන්දනාමකො,
සත්තරතනසම්පන්නො චක්කවත්තී මහබ්බලො.

2423. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

ආලම්බනඤ්ච අජිනං මංසදා රක්ඛදායකො
අව්යාධි අඞ්කොලං සොණ්ණං මිඤ්ජං ආවෙල වන්දනං
පඤ්චපඤ්ඤාස ගාථායො ගණිතා අත්ථදස්සිහි.

2424. ආරාමද්වාරා නික්ඛම්ම ඵලකං සන්ථරිං අහං,
උදකඤ්ච උපට්ඨාසිං උත්තමත්ථස්ස පත්තියා.

2425. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි ආසනෙ චොදකෙ ඵලං.

2426. ඉතො පණ්ණරසෙ කප්පෙ අභිසාමසමව්හයො,
සත්තරතනසම්පන්නො චක්කවත්තී මහබ්බලො.