2401. නාරදො ඉති මෙ නාමං කස්සපො ඉති මං විදූ,
අද්දසං සමණානග්ගං විපස්සිං දෙවසක්කතං.

2402. අනුබ්යඤ්ජනධරං බුද්ධං ආහුතීනං පටිග්ගහං,
අඞ්කොලපුප්ඵං පග්ගය්හ බුද්ධස්ස අභිරොපයිං.

2403. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2404. චතුසත්තතිතො කප්පෙ රොමසො නාම ඛත්තියො,
ආමුත්තමාලාභරණො සයොග්ගබලවාහනො.

2405. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2406. උය්යානභූමිං නිය්යන්තො අද්දසං ලොකනායකං,
වටංසකං ගහෙත්වාන සොවණ්ණං සාධුනිම්මිතං.

2407. සීඝං තතො සමොරුය්හ හත්ථික්ඛන්වධගතො අහං,
බුද්ධස්ස අභිරොපෙසිං සිඛිනො ලොකබන්ධුනො.

2408. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.

2409. සත්තවීසෙ ඉතො කප්පෙ එකො ආසිං ජනාධිපො,
මහාපතාප නාමෙන චක්කවත්තී මහබ්බලො.

2410. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2411. නිබ්බුතෙ ලොකනාථම්හි සිඛිම්හි වදතං වරෙ,
වටංසකෙහි ආකිණ්ණං බොධිපූජමකාසහං.

2412. එකතිංසෙ ඉතො කප්පෙ යං පූජමකරිං තදා,
දුග්ගතිං නාභිජානාමි බොධිපූජායිදං ඵලං.

2413. ඉතො ඡබ්බීසතිකප්පෙ අහුං මෙඝබ්භ නාමකො,
සත්තරතනසම්පන්නො චක්කවත්තී මහබ්බලො.

2414. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2415. අසිතො නාම නාමෙන මාලාකාරො අහුං තදා,
ආවෙලං පග්ගහෙවොන රඤ්ඤො දාතුං වජාමහං.

2416. අසම්පත්තම්හි රාජානං අද්දසං සිඛිනායකං.
හට්ඨො හට්ඨෙන චිත්තෙන බුද්ධස්ස අභිරොපයිං.

2417. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.