205. නිග්ගුණ්ඩිපුප්ඵියත්ථෙරාපදානං
2290. විපස්සිස්ස භගවතො ආසිමාරාමිකො අහං,
නිග්ගුණ්ඩිපුප්ඵං පග්ගය්හ බුද්ධස්ස අභිරොපයිං.
නිග්ගුණ්ඩිපුප්ඵං පග්ගය්හ බුද්ධස්ස අභිරොපයිං.
2291. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.
දුග්ගතිං නාභිජානාමි බුද්ධපූජායිදං ඵලං.
2292. පඤ්චතිංසෙ ඉතො කප්පෙ එකො ආසිං ජනාධිපො,
මහාපතාපො නාමෙන චක්කවත්තී මහබ්බලො.
මහාපතාපො නාමෙන චක්කවත්තී මහබ්බලො.
2293. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.
ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නිග්ගුණ්ඩිපුප්ඵියො ථෙරො ඉමා ගාථායො අභාසිත්ථාති.
නිග්ගුණ්ඩිපුප්ඵියත්ථෙරස්ස අපදානං පඤ්චමං.
206. උදකදායකත්ථෙරාපදානං.
2294. භුඤ්ජන්තං සමණං දිස්වා විප්පසන්නමනාවිලං,
ඝටෙනො’දකමාදාය සිද්ධත්ථස්ස අදාසහං.
ඝටෙනො’දකමාදාය සිද්ධත්ථස්ස අදාසහං.
2295. නිම්මලො හොම’හං අජ්ජ විමලො ඛීණසංසයො,
භවෙ නිබ්බත්තමානම්හි ඵලං නිබ්බත්තතෙ සුභං.
භවෙ නිබ්බත්තමානම්හි ඵලං නිබ්බත්තතෙ සුභං.
2296. චතුනවුතෙ ඉතො කප්පෙ උදකං යං තදා අදං,
දුග්ගතිං නාභිජානාමි උදකදානස්සිදං ඵලං.
දුග්ගතිං නාභිජානාමි උදකදානස්සිදං ඵලං.
2297. එකසට්ඨිම්හිතො කප්පෙ එකොව විමලො අහුං,
සත්තරතනසම්පන්නො චක්කවත්තී මහබ්බලො.
සත්තරතනසම්පන්නො චක්කවත්තී මහබ්බලො.
2298. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.
ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උදකදායකො ථෙරො ඉමා ගාථායො අභාසිත්ථාති.
උදකදායකත්ථෙරස්ස අපදානං ඡට්ඨං.
207. සලලමාලියත්ථෙරාපදානං
2299. කණිකාරංව ජොතන්තං නිසින්නං පබ්බතන්තරෙ,
ඔභාසෙන්තං දිසා සබ්බා සිද්ධත්ථං නරසාරථිං.
ඔභාසෙන්තං දිසා සබ්බා සිද්ධත්ථං නරසාරථිං.
2300. ධනුමද්වෙජ්ඣං කත්වාන උසුං සන්නය්හ’හං තදා,
පුප්ඵං සවණටං ඡෙත්වාන බුද්ධස්ස අභිරොපයිං.
පුප්ඵං සවණටං ඡෙත්වාන බුද්ධස්ස අභිරොපයිං.
2301. චතුනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.
දුග්ගතිං නාභිජානාමි බුද්ධපූජායිදං ඵලං.
2302. එකපඤ්ඤාසි’තො කප්පෙ එකො ආසිං ජුතින්ධරො,
සත්තරතනසම්පන්නො චක්කවත්තී මහබ්බලො.
සත්තරතනසම්පන්නො චක්කවත්තී මහබ්බලො.
2303. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.
ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සල්ලමාලියො ථෙරො ඉමා ගාථායො අභාසිත්ථාති.
සලලමාලියත්ථෙරස්ස අපදානං සත්තමං.
208. කොරණ්ඩපුප්ඵියත්ථෙරාපදානං
2304. අක්කන්තඤ්ච පදං දිස්වා චක්කාලඞ්කාර භූසිතං,
පදෙනා’නුපදං යන්තො විපස්සිස්ස මහෙසිනො.
පදෙනා’නුපදං යන්තො විපස්සිස්ස මහෙසිනො.
2305. කොරණ්ඩං පුප්ඵිතං දිස්වා සමූලං පූජිතං මයා,
හට්ඨො හට්ඨෙන චිත්තෙන අවන්දිං පදමුත්තමං.
හට්ඨො හට්ඨෙන චිත්තෙන අවන්දිං පදමුත්තමං.
2306. එකනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි පදපූජායිදං ඵලං.
දුග්ගතිං නාභිජානාමි පදපූජායිදං ඵලං.
2307. සත්තපඤ්ඤාසකප්පම්හි එකො වීතමලො අහු,
සත්තරතනසම්පන්නො චක්කවත්තී මහබ්බලො.
සත්තරතනසම්පන්නො චක්කවත්තී මහබ්බලො.
2308. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.
ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කොරණ්ඩපුප්ඵියො ථෙරො ඉමා ගාථායො අභාසිත්ථාති.
කොරණ්ඩපුප්ඵියත්ථෙරස්ස අපදානං අට්ඨමං.