2313. තිස්සස්ස තු භගවතො දෙවදෙවස්ස තාදිනො,
එකච්ඡත්තං මයා දින්නං විප්පසන්නෙන චෙතසා.

2314. නිවුතං හොතී මෙ පාපං කුසලස්සු’පසම්පදා,
ආකාසෙ ඡත්තං ධාරෙන්ති පුබ්බකම්මස්සිදං ඵලං.

2315. චරිමං වත්තතෙ මය්හං භවා සබ්බෙ සමූහතා,
ධාරෙමි අන්තිමං දෙහං සම්මාසම්බුද්ධසාසනෙ.

2316. ද්වෙනවුතෙ ඉතො කප්පෙ යං ඡත්තමදදිං තදා,
දුග්ගතිං නාභිජානාමි ඡත්තදානස්සිදං ඵලං.

2317. ද්වෙසත්තතිම්හිතො කප්පෙ අට්ඨාසිංසු ජනාධිපා,
මහානිදානනාමෙන රාජානො චක්කවත්තිනො.

2318. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

කණිකාරො මිනෙලඤ්ච කිඞ්කිණී තරණෙන ච
නිග්ගුණ්ඩිපුප්ඵි දකදො සලලො ච කුරණ්ඩකො
ආධාරකොතපවාරී අට්ඨතාළීස ගාථකා.

2319. සිද්ධත්ථස්ස භගවතො දිපදින්දස්ස තාදිනො,
නාගසෙට්ඨො මයා දින්නො ඊසාදන්තො උරූළ්හවා.

2320. උත්තමත්ථං අනුභොමි සන්තිපදමනුත්තරං,
අග්ගදානං මයා දින්නං සබ්බලොකහිතෙසිනො.

2321. චතුනවුතෙ ඉතො කප්පෙ යං නාගමදදිං තදා,
දුග්ගතිං නාභිජානාමි නාගදානස්සිදං ඵලං.

2322. අට්ඨසත්තතිකප්පම්භි සොළසා’සිංසු ඛත්තියා,
සමන්තපාසාදිකා නාම චක්කවත්තී මහබ්බලා.

2323. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2324. ආරඤ්ඤකස්ස ඉසිනො චිරරත්තතපස්සිනො,
වුද්ධස්ස භාවිතත්තස්ස අදාසිං පානධිං අහං.

2325. තෙන කම්මෙන දිපදින්ද ලොකජෙට්ඨ නරාසභ,
සබ්බං යානං අනුභොමි පුබ්බකම්මස්සිදං ඵලං.

2326. චතුනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පානධිස්ස ඉදං ඵලං.

2327. සත්තසත්තති’තො කප්පෙ අට්ඨ ආසිංසු ඛත්තියා,
සුයානා නාම නාමෙන චක්කවත්තී මහබ්බලා.

2328. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.