2129. අනොමදස්සී භගවා දිපදින්දො නරාසභො,
දිට්ඨධම්මසුඛත්ථාය අබ්භොකාසම්හි චඞ්කමි.

2130. පසන්නචිත්තො සුමනො වන්දිත්වා පුප්ඵමොකිරිං,
උද්ධතෙ පාදෙ පුප්ඵානි සීසමුද්ධනි තිට්ඨරෙ.

2131. වීසකප්පසහස්සම්හි ඉතො පඤ්ච ජනා අහූ,
පුප්ඵච්ඡදනියා නාම චක්කවත්තී මහබ්බලා.

2132. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2133. පදුමුත්තරස්ස මුනිනො සලලෙ බොධිමුත්තමෙ,
පසන්නචිත්තො සුමනො එකදීපං අදාසහං.

2134. භවෙ නිබ්බත්තමානම්හි නිබ්බත්තෙ පුඤ්ඤසඤ්චයෙ,
දුග්ගතිං නාභිජානාමි දීපදානස්සිදං ඵලං.

2135. සොළසකප්පසහස්සෙ ඉතො තෙ චතුරො ජනා,
චන්දාභා නාම නාමෙන චක්කවත්තී මහබ්බලා.

2136. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2137. ඔරෙන හිමවන්තස්ස නදිකා සම්පවත්තථ,
තස්සා චානුපඛෙත්තම්භි සයම්භූ වසතෙ තදා.

2138. මණිං පග්ගය්හ පල්ලඞ්කං සාධුචිත්තං මනොරමං,
පසන්නචිත්තො සුමනො බුද්ධස්ස අභිරොපයිං.

2139. චතුනවුතෙ ඉතො කප්පෙ යං මණිං අභිරොපයිං,
දුග්ගතිං නාභිජානාමි බුද්ධපූජායිදං ඵලං.

2140. ඉතො ච ද්වාදසෙ කප්පෙ සතරංසි සනාමකා,
අට්ඨ තෙ ආසුං රාජානො චක්කවත්තී මහබ්බලා.

2141. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2142. නගරෙ බන්ධුමතියා වෙජ්ජො ආසිං සුසික්ඛිතො,
ආතුරානං සදුක්ඛානං මහාජනසුඛාවහො.

2143. ව්යාධිතං සමණං දිස්වා සීලවන්තං මහාජුතිං,
පසන්නචිත්තො සුමනො භෙසජ්ජමදදිං තදා.

2144. අරොගො ආසි තෙනෙව සමණො සංවුතින්ද්රියො,
අසොකො නාම නාමෙන උපට්ඨාකො විපස්සිනො.

2145. එකනවුතෙ ඉතො කප්පෙ යමොසධමදාසභං,
දුග්ගතිං නාභිජානාමි භෙසජ්ජස්ස ඉදං ඵලං.

2146. ඉතො ච අට්ඨමෙ කප්පෙ සබ්බොසධසනාමකො,
සත්තරතනසම්පන්නො චක්කවත්තී මහබ්බලො.

2147. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2148. වෙස්සභුම්භි භගවති අහොසාරාමිකො අහං,
පසන්නචිත්තො සුමනො උපට්ඨිං සංඝමුත්තමං.

2149. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි උපට්ඨානස්සිදං ඵලං.

2150. ඉතො තෙ සත්තමෙ කප්පෙ සත්තෙවාසුං සමොදකා,
සත්තරතනසම්පන්නො චක්කවත්තී මහබ්බලා.

2151. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

කුමුදො අථ නිස්සෙණී රත්තිකො උදපානදො
සීහාසනී මග්ගදදො එකදීපි මණිප්පදො
තිකිච්ඡකො උපට්ඨාකො එකූනපඤ්ඤාස ගාථකාති.