2043. හිමවන්තස්ස අවිදූරෙ මහාජාතස්සරො අහු,
පදුමුප්පලසඤ්ඡන්නො පුණ්ඩරීකසමොත්ථටො.

2044. කුකුත්ථො නාම නාමෙන තත්ථාසිං සකුණො තදා,
සීලවා බුද්ධිසම්පන්නො පුඤ්ඤාපුඤ්ඤෙසු කොවිදො.

2045. පදුමුත්තරො ලොකවිදූ ආහුතීනං පටිග්ගහො,
ජාතස්සරස්සාවිදූරෙ සඤ්චරිත්ථ මහාමුනි.

2046. ජලජං කුමුදං ඡෙත්වා උපනෙසිං මහෙසිනො,
මම සඞ්කප්පමඤ්ඤාය පටිග්ගහි මහාමුනි.

2047. තඤ්ච දානං දදිත්වාහං සුක්කමූලෙන චොදිතො,
කප්පානං සතසහස්සං දුග්ගතිං නූපපජ්ජහං.

2048. සොළසෙතො කප්පසතෙ ආසුං වරුණනාමකා,
අට්ඨ එතෙ ජනාධිපා චක්කවත්තී මහබ්බලා.

2049. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

බන්ධුජීවො තම්බපුප්ඵි වීථි කක්කාරුපුප්ඵියො
මන්දාරවො කදම්බී ච සූලකො නාගපුප්ඵියො
පුන්නාගො කොමුදී ගාථා ඡප්පඤ්ඤාස පකිත්තිතාති.

2050. පදුමො නාම නාමෙන දිපදින්දො නරාසභො,
පවනා අභිනික්ඛම්ම ධම්මං දෙසෙසි චක්ඛුමා.

2051. යක්ඛානං සමයො ආසි අවිදූරෙ මහෙසිනො,
යෙන කිච්චෙන සම්පත්තා අජ්ඣාපෙක්ඛිංසු තාවදෙ.

2052. බුද්ධස්ස ගිරමඤ්ඤාය අමතස්ස ච දෙසනං,
පසන්නචිත්තො සුමනො අප්ඵොඨෙත්වා උපට්ඨහිං.

2053. සුචිණ්ණස්ස ඵලං පස්ස උපට්ඨානස්ස සත්ථුනො,
තිංසකප්පසහස්සෙසු දුග්ගතිං නුපපජ්ජහං.

2054. ඌනතිංසෙ කප්පසතෙ සමලඞ්කතනාමකො,
සත්තරතනසම්පන්නො චක්කවත්තී මහබ්බලො.

2055. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2056. සිද්ධත්ථො නාම භගවා ලොකජෙට්ඨො නරාසභො,
පුරක්ඛතො සාවකෙහි නගරං පටිපජ්ජථ.

2057. රඤ්ඤො අන්තෙපුරෙ ආසිං ගොපකො අභිසම්මතො,
පාසාදෙ උපවිට්ඨොහං අද්දසං ලොකනායකං.

2058. කණවෙරං ගහෙත්වාන භික්ඛුසංඝෙ සමොකිරිං,
බුද්ධස්ස විසුං කත්වාන තතො භිය්යො සමොකිරිං.

2059. චතුනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි පුප්ඵපූජායිදං ඵලං.

2060. සත්තාසීතිම්හිතො කප්පෙ චතුරො ආසුං මහිද්ධිකා,
සත්තරතනසම්පන්නා චක්කවත්තී මහබ්බලා.

2061. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.