1983. සුමෙධො නාම නාමෙන සයම්භූ අපරාජිතො,
විවෙකමනුබ්රූහන්තො අජ්ඣොගාහි මහාවනං.

1984. සලලං පුප්ඵිතං දිස්වා ගන්ථිත්වාන වටංසකං,
බුද්ධස්ස අභිරොපෙසිං සම්මුඛා ලොකනායකං.

1985. තිංසකප්පසහස්සම්හි යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

1986. ඌනවීසෙ කප්පසතෙ සොළසාසිංසු නිම්මිතා,
සත්තරතනසම්පන්නා චක්කවත්තී මහබ්බලා.

1987. පටිසම්භිදා -පෙ- කතං බුද්ධස්ස සාසනං.

1988. සුමෙධස්ස භගවතො ලොකජෙට්ඨස්ස තාදිනො,
පල්ලඞ්කො හි මයා දින්නො සඋත්තර සපච්ඡදො.

1989. සත්තරතනසම්පන්නො පල්ලඞ්කො ආසි සො තදා,
මම සඞ්කප්පමඤ්ඤාය නිබ්බත්තති සදා මම.

1990. තිංසකප්පසහස්සම්හි පල්ලඞ්කමදදිං තදා,
දුග්ගතිං නාභිජානාමි පල්ලඞ්කස්ස ඉදං ඵලං.

1991. වීසකප්පසහස්සම්හි සුවණ්ණාභා තයො ජනා,
සත්තරතනසම්පන්නා චක්කවත්තී මහබ්බලා.

1992. පටිසම්භිදා -පෙ- කතං බුද්ධස්ස සාසනං.

ඡත්තං ථම්භො ච වෙදි ච පරිවාරුම්මපුප්ඵියො
අනුලෙපො මග්ගදායී ඵලකදායී වටංසකො
පල්ලඞ්කදායී ගාථායො ඡපඤ්ඤාස පකිත්තිතා.

1993. චන්දංව විමලං සුද්ධං විප්පසන්නමනාවිලං,
නන්දීභවපරික්ඛීණං තිණ්ණං ලොකෙ විසත්තිකං.

1994. නිබ්බාපයන්තං ජනතං තිණ්ණං තාරයතං වරං,
වනස්මිං ඣායමානං තං එකග්ගං සුසමාහිතං.

1995. බන්ධුජීවකපුප්ඵානි ලග්ගෙත්වා සුත්තකෙනහං,
බුද්ධස්ස අභිරොපෙසිං සිඛිනො ලොකබන්ධුනො.

1996. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි බුද්ධපූජායිදං ඵලං.

1997. ඉතො සත්තමකෙ කප්පෙ මනුජින්දො බ්රහායසො,
සමන්තචක්ඛු නාමාසිං චක්කවත්තී මහබ්බලො.

1998. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.