1941. පරිනිබ්බුතෙ භගවති අත්ථදස්සිනරුත්තමෙ,
ඡත්තාතිඡත්තං කාරෙත්වා ථූපම්භි අභිරොපයිං.

1942. කාලෙන කාලං ආගන්ත්වා නමස්සිං සත්ථු චෙතියං,
පුප්ඵච්ඡදනං කත්වාන ඡත්තම්හි අභිරොපයිං.

1943. සත්තරසෙ කප්පසතෙ දෙවරජ්ජං අකාරයිං,
මනුස්සත්තං න ගච්ඡාමි ථූපපූජායි දං ඵලං.

1944. පටිසම්භිදා -පෙ- කතං බුද්ධස්ස සාසනං.

1945. නිබ්බුතෙ ලොකනාථම්හි ධම්මදස්සිනරාසභෙ,
ආරොපෙසිං ධජත්ථම්හං බුද්ධසෙට්ඨස්ස චෙතියෙ.

1946. නිස්සෙණිං මාපයිත්වාන ථූපසෙට්ඨං සමාරුහිං,
ජාතිපුප්ඵං ගහෙත්වාන ථූපමහි අභිරොපයිං.

1947. අහො බුද්ධො ධම්මො අහො නො සත්ථූසම්පදා,
දුග්ගතිං නාභිජානාමි ථූපපූජායි දං ඵලං.

1948. චතුනවුතෙ ඉතො කප්පෙ ථූපසිඛරනාමකා,
සොළසාසිංසු රාජානො චක්කවත්තී මහබ්බලො.

1949. පටිසම්භිදා -පෙ- කතං බුද්ධස්ස සාසනං.

1950. නිබ්බුතෙ ලොකනාථම්හි පියදස්සී නරුත්තමෙ,
පසන්නචිත්තො සුමනො මුත්තාවෙදිමකාසහං.

1951. මණීහි පරිවාරෙත්වා අකාසිං වෙදිමුත්තමං,
වෙදිකාය මහං කත්වා තත්ථ කාලකතො අහං.

1952. යං යං යොනුපපජ්ජාමි දෙවත්තං අථ මානුසං,
මණී ධාරෙන්ති ආකාසෙ පුඤ්ඤකම්මස්සිදං ඵලං.

1953. සොළසෙ ‘තො කප්පසතෙ මණිප්පභාසනාමකා,
බත්තිංසාසිංසු රාජානො චක්කවත්තී මහබ්බලා.

1954. පටිසම්භිදා -පෙ- කතං බුද්ධස්ස සාසනං.

1955. පදුමුත්තරො නාම ජිනො ලොකජෙට්ඨො නරාසභො,
ජලිත්වා අග්ගික්ඛන්ධො’ව සම්බුද්ධො පරිනිබ්බුතො.

1956. නිබ්බුතෙ ච මහාවීරෙ ථූපො විත්ථාරිකො අහු,
අහොරත්තං උපට්ඨෙන්ති ධාතුගෙහෙ වරුත්තමෙ.

1957. පසන්නචිත්තො සුමනො අකං චන්දනවෙදිකං,
දීයති ධූමක්ඛන්ධො ච ථූපානුච්ඡවිකො තදා.

1958. භවෙ නිබ්බත්තමානම්හි දෙවත්තෙ අථ මානුසෙ,
ඔමත්තං මෙ න පස්සාමි පුබ්බකම්මස්සිදං ඵලං

1959. පඤ්චදසෙ කප්පසතෙ ඉතො අට්ඨජනා අහු,
සබ්බෙ සමත්තනාමා තෙ චක්කවත්තී මහබ්බලා.

1960. පටිසම්භිදා -පෙ- කතං බුද්ධස්ස සාසනං.

1961. නිබ්බුතෙ ලොකනාථම්භි අහුතීනං පටිග්ගහෙ,
සිද්ධත්ථම්හි භගවති මහාථූපමහො අහු.

1962. මහෙ පවත්තමානම්භි සිද්ධත්ථස්ස මහෙසිනො,
උම්මාපුප්ඵං ගහෙත්වාන ථූපම්හි අභිරොපයිං.