1923. නාරදො ඉති මෙ නාමං කෙසවො ඉති මං විදූ,
කුසලාකුසලං එසං අගමං බුද්ධසන්තිකං.

1924. මෙත්තචිත්තො කාරුණිකො අත්ථදස්සී මහාමුනි,
අස්සාසයන්තො සත්තෙ සො ධම්මං දෙසෙති චක්ඛුමා.

1925. සකං චිත්තං පසාදෙත්වා සිරෙ කත්වාන අඤ්ජලිං,
සත්ථාරං අභිවාදෙත්වා පක්කාමිං පාචිනාමුඛො.

1926. සත්තරසෙ කප්පසතෙ රාජා ආසිං මහීපති,
අමිත්තතාපනො නාම චක්කවත්තී මහබ්බලො.

1927. පටිසම්භිදා -පෙ- කතං බුද්ධස්ස සාසනං.

1928. මිගරාජා තදා ආසිං අභිජාතො සුකෙසරී,
ගිරිදුග්ගං ගවෙසන්තො අද්දසං ලොකනායකං.

1929. අයං නුඛො මහාවීරො නිබ්බාපෙති මහාජනං,
යන්නූනාහං උපාසෙය්යං දෙවදෙවං නරාසභං.

1930. සාඛං සාලස්ස භඤ්ජිත්වා සකොසං පුප්ඵමාහරිං,
උපාගන්ත්වාන සම්බුද්ධං අදාසිං පුප්ඵමුත්තමං.

1931. එකනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි පුප්ඵදානස්සිදං ඵලං.

1932. ඉතො ච නවමෙ කප්පෙ විරොචන සනාමකා,
තයො ආසිංසු රාජානො චක්කවත්තී මහබ්බලො.

1933. පටිසම්භිදා -පෙ- කතං බුද්ධස්ස සාසනං.

1934. පාරාධකො තදා ආසිං පරපාණුපරොධකො,
පබ්භාරෙ සෙය්යං කප්පෙමි අවිදූරෙ සිඛිසත්ථුනො.

1935. සායං පාතඤ්ච පස්සාමි බුද්ධං ලොකග්ගනායකං,
දෙය්යධම්මො ච මෙ නත්ථි දිපදින්දස්ස තාදිනො.

1936. පියාලඵලමාදාය අගමං බුද්ධසන්තිකං,
පටිග්ගහෙසි භගවා ලොකජෙට්ඨො නරාසභො.

1937. තතො පරං උපාදාය පරිවාරං විනායකං,
තෙන චිත්තප්පසාදෙන තත්ථ කාලකතො අහං.

1938. එකතිංසෙ ඉතො කප්පෙ යං ඵලං අදදිං අහං,
දුග්ගතිං නාභිජානාමි ඵලදානස්සිදං ඵලං.

1939. ඉතො පණ්ණරසෙ කප්පෙ තයො ආසුං පියාලිනො,
සත්තරතනසම්පන්නා චක්කවත්තී මහබ්බලා.

1940. පටිසම්භිදා -පෙ- කතං බුද්ධස්ස සාසනං.