1886. චන්දභාගානදීතීරෙ අහොසිං කින්නරො තදා,
පුප්ඵභක්ඛො ච’හං ආසිං පුප්ඵනිවසනො තථා.

1887. අත්ථදස්සී තු භගවා ලොකජෙට්ඨා නරාසභො,
විපිනග්ගෙන නිය්යාසි හංසරාජාව අම්බරෙ.

1888. “නමො තෙ පුරිසාජඤ්ඤ චිත්තං තෙ සුවිසොධිතං,
පසන්නමුඛනෙත්තො’සි විප්පසන්නමුඛින්ද්රියො.

1889. ඔරොහිත්වාන ආකාසා භූරිපඤ්ඤො සුමෙධසො,
සඞ්ඝාටිං පත්ථරිත්වාන පල්ලඞ්කෙන උපාවිසි.

1890. විලීනං චන්දනාදාය අගමාසිං ජිනන්තිකං,
පසන්නචිත්තො සුමනො බුද්ධස්ස අභිරොපයිං.

1891. අභිවාදෙත්වාන සම්බුද්ධං ලොකජෙට්ඨං නරාසභං,
පාමොජ්ජං ජනයිත්වාන සක්කාමිං උත්තරාමුඛො.

1892. අට්ඨාරසෙ කප්පසතෙ චන්දනං යං අපූජයිං,
දුග්ගතිං නාභිජානාමි බුද්ධපූජායිදං ඵලං.

1893. චතුද්දසෙ කප්පසතෙ ඉතො ආසිංසු තෙ තයො,
රොහිතා නාම නාමෙන චක්කවත්තී මහබ්බලො.

1894. පටිසම්භිදා -පෙ- කතං බුද්ධස්ස සාසනං.

1895. සුනන්දො නාම නාමෙන බ්රාහ්මණො මන්තපාරගූ,
අජ්ඣායකො යාජයොගො වාජපෙය්යං අයාජයී.

1896. පදුමුත්තරො ලොකවිදූ අග්ගො කාරුණිකො ඉසි,
ජනතං අනුකම්පන්තො අම්බරෙ චඞ්කමි තදා.

1897. චඞ්කමිත්වාන සම්බුද්ධො සබ්බඤ්ඤූ ලොකනායකො,
මෙත්තාය අඵරී සත්තෙ අප්පමාණං නිරූපධි.

1898. වණ්ටෙ ඡෙත්වාන පුප්ඵානි බ්රාහ්මණො මන්තපාරගූ,
සබ්බෙ සිස්සෙ සමානෙත්වා ආකාසෙ උක්ඛිපාපයි.

1899. යාවතා නගරං ආසි පුප්ඵානං ඡදනං තදා,
බුද්ධස්ස ආනුභාවෙන සත්තාහං න විගච්ඡථ.

1900. තෙනෙව සුක්කමූලෙන අනුභොත්වාන සම්පදා,
සබ්බාසවෙ පරිඤ්ඤාය තිණ්ණො ලොකෙ විසත්තිකං.

1901. එකාදසෙ කප්පසතෙ පඤ්චතිංසා’සු ඛත්තියා,
අම්බරංස සනාමා තෙ චක්කවත්තී මහබ්බලො.