1742. පදුමුත්තරබුද්ධස්ස සාවකා වනචාරිනො,
විප්පනට්ඨා බ්රහාරඤ්ඤෙ අන්ධාව අනුසූයරෙ.

1743. අනුස්සරිත්වා සම්බුද්ධං පදුමුත්තරනාමකං,
තස්ස තෙ මුනිනො පුත්තා විප්පනට්ඨා මහාවනෙ.

1744. භවනා ඔරුහිත්වාන අගමං භික්ඛුසන්තිකං,
තෙසං මග්ගඤ්ච ආචික්ඛිං භොජනඤ්ච අදාස’හං.

1745. තෙන කම්මෙන දිපදින්දෙ ලොකජෙට්ඨෙ නරාසභෙ,
ජාතියා සත්තවස්සො’හං අරහත්තමපාපුණිං.

1746. සචක්ඛූ නාම නාමෙන ද්වාදස චක්කවත්තිනො,
සත්තරතනසම්පන්නා පඤ්චකප්පසතෙ ඉතො.

1747. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

1748. අත්ථදස්සිම්හි සුගතෙ නිබ්බුතෙ සමනන්තරා,
යක්ඛයොනිං උපපජ්ජිං යසං පත්තො ච’හං තදා.

1749. දුල්ලද්ධං වත මෙ ආසිං දුප්පභාතං දුරුට්ඨිතං,
යං මෙ භොගෙ විජ්ජමානෙ පරිනිබ්බායි චක්ඛුමා.

1750. මම සඞ්කප්පමඤ්ඤාය සාගරො නාම සාවකො,
මමුද්ධරිතුකාමො සො ආගච්ඡි මම සන්තිකං.

1751. “කින්නු සොචසි මා භාසි චර ධම්මං සුමෙධස,
අනුප්පදින්නා බුද්ධෙන සබ්බෙසං බීජසම්පදා.

1752. යො ච පූජෙය්ය සම්බුද්ධං තිට්ඨන්තං ලොකනායකං,
ධාතුං සාසපමත්තං හි නිබ්බුතස්සාපි පූජයෙ.

1753. සමෙ චිත්තප්පසාදම්භි සමං පුඤ්ඤං මහග්ගතං,
තස්මා ථූපං කරිත්වාන පූජෙහි ජිනධාතුයො”.

1754. සාගරස්ස වචො සුත්වා බුද්ධථූපං අකාසහං,
පඤ්ච වස්සෙ පරිචරිං මුනිනො ථූපමුත්තමං.

1755. තෙන කම්මෙන දිපදින්දෙ ලොකජෙට්ඨෙ නරාසභෙ,
සම්පත්තිං අනුභොත්වාන අරහත්තං අපාපුණිං.

1756. භූරිපඤ්ඤා ච චත්තාරො සත්තකප්පසතෙ ඉතො,
සත්තරතනසම්පන්නා චක්කවත්තී මහබ්බලා.

1757. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

1758. ජායන්තස්ස විපස්සිස්ස අලොකො විපුලො අහු,
පඨවී ච පකම්පිත්ථ සසාගරා සපබ්බතා.

1759. නෙමිත්තා ච වියාකංසු බුද්ධො ලොකෙ භවිස්සති,
අග්ගො ච සබ්බසත්තානං ජනතං උද්ධරිස්සති.

1760. නෙමිත්තානං සුණිත්වාන ජාතිපූජමකාසහං,
එදිසා පූජනා නත්ථි යාදිසා ජාතිපූජනා.

1761. සංවරිත්වාන කුසලං සකං චිත්තං පසාදයිං,
ජාතිපූජං කරිත්වාන තත්ථ කාලකතො අහං.