140. හිමවන්තස්ස අවිදූරෙ ලම්බකො නාම පබ්බතො,
අස්සමො සුකතො මය්හං පණ්ණසාලා සුමාපිතා.

141. උත්තානකූලා නදිකා සුපතිත්ථා මනොරමා,
සුසුද්ධ පුලිනාකිණ්ණා අවිදූරෙ මම’ස්සමා.

142. අසක්ඛරා අපබ්භාරා සාදු අප්පටිගන්ධිකා,
සන්දති නදිකා තත්ථ සොභයන්තා මම’ස්සමං.

143. කුම්භීලා මකරා චෙත්ථ සුංසුමාරා ච කච්ඡපා,
චරන්ති නදියා තත්ථ සොභයන්තා මම’ස්සමං.

144. පාඨීනා පාවුසා මච්ඡා වලජා මුඤ්ජරොහිතා,
මග්ගුරා පපතායන්තා සොභයන්ති මම’ස්සමං.

145. උභොකූලෙසු නදියා පුප්ඵිනො ඵලිනො දුමා,
උභතො අභිලම්බන්තා සොභයන්ති මම’ස්සමං.

146. අම්බා සාලා ච තිලකා පාටලී සින්දුවාරකා
දිබ්බගන්ධං සම්පවන්ති පුප්ඵිතා මම අස්සමෙ.

147. චම්පකා සලලා නීපා නාගපුන්නාගකෙතකා,
දිබ්බගන්ධං සම්පවන්ති පුප්ඵිතා මම අස්සමෙ.

148. අතිමුත්තා අසොකා ච භගිනිමාලා ච පුප්ඵිතා,
අඞ්කොලා බිම්බිජාලා ච පුප්ඵිතා මම අස්සමෙ.

149. කෙටකා කන්දලී චෙව ගොධුකා තිණසූලිකා,
දිබ්බගන්ධං සම්පවන්ති සොභයන්තා මම’ස්සමං.

150. කණිකාරා කණ්ණිකා ච අසනා අජ්ජුනා බහූ,
දිබ්බගන්ධං සම්පවන්ති සොභයන්තා මමස්ස’මං.

151. පුන්නාගා ගිරිපුන්නාගා කොවිළාරා ච පුප්ඵිතා,
දිබ්බගන්ධං සම්පවන්ති සොභයන්තා මමස්ස’මං.

152. උද්දාලකා ච කුටජා කදම්බා වකුලා බහූ,
දිබ්බගන්ධං සම්පවන්ති සොභයන්තා මමස්ස’මං.

153. ආළකා ඉසිමුග්ගා ච කදලී මාතුලුඞ්ගියො,
ගන්ධොදකෙන සංවද්ධා ඵලානි ධාරයන්ති තෙ.

154. අඤ්ඤෙ පුප්ඵන්ති පදුමා අඤ්ඤෙ ජායන්ති කෙසරී,
අඤ්ඤෙ ඔපුප්ඵා පදුමා පුප්ඵිතා තළාකෙ සදා.

155. ගබ්භං ගණ්හන්ති පදුමා නිද්ධාවන්ති මුලාලියො,
සිඞ්ඝාටකපත්තමාකිණ්ණා සොභන්ති තළාකෙ සදා.

156. නයිතා අම්බගන්ධී ච උත්තාලා බන්ධුජීවකා,
දිබ්බගන්ධං සම්පවන්ති තළාකෙ පුප්ඵිතා සදා.

157. පාඨීනා පාවුසා මච්ඡා වලජා මුඤජ-රොහිතා
සඞ්ගුලා මඞ්ගුරා චෙව වසන්ති තළාකෙ සදා.

158. කුම්භීලා සුංසුමාරා ච තන්තිගාහා ච රක්ඛසා,
ඔගුහා අජගරා ච වසන්ති තළාකෙ සදා.

159. පාරෙවතා රවිහංසා චක්කවාකා නදීචරා,
කොකිලා සුකසාළීකා උපජීවන්ති තං සරං.

160. කුකුත්ථකා කුලීරකා වනෙ පොක්ඛරසාතකා
දින්දිභා සුවපොතා ච උපජීවන්ති තං සරං.

161. හංසා කොඤ්චා මයූරා ච කොකිලා තම්බ චූළිකා,
පම්පකා ජීවංජීවා ච උපජීවන්ති තං සරං.

162. කොසිකා පොට්ඨසීසා ච කුරරා සෙනකා බහූ,
මහාකාලා ච සකුණා උපජීවන්ති තං සරං.

163. පසදා ච වරාහා ච චකා භෙරණ්ඩකා බහූ,
රොහිච්චා සුග්ගපොතා ච උපජීවන්ති තං සරං.

164. සීහ ව්යග්ඝා ච දීපී ච අච්ඡකොකතරච්ඡකා,
තිධාපභින්නා මාතඞ්ගා උපජීවන්ති තං සරං.

165. කින්නරා වානරා චෙව අථො පි වනකම්මිකා,
චෙතා ච ලුද්දකා චෙව උපජීවන්ති තං සරං.

166. තින්දුකානි පියාලානි මධුකා කාසුමාරයො,
ධුවප්ඵලානි ධාරෙන්ති අවිදූරෙ මම’ස්සමා.

167. කොසුම්භා සලලා නීපා සාදුඵලසමායුතා,
ධුවප්ඵලානි ධාරෙන්ති අවිදූරෙ මම’ස්සමා.

168. හරීතකා ආමලකා අම්බා ජම්බුවිභීටකා,
කොලා භල්ලාතකා බිල්ලා ඵලානි ධාරයන්ති තෙ.

169. ආලුවා ච කලම්බා ච බිළාලීතක්කළානිච,
ජීවකා සුතකා චෙව බහුකා මම අස්සමෙ.