1. යස්ස කාමරාගානුසයො පහීනො තස්ස පටිඝානුසයො පහීනොති: ආමන්තා.

යස්ස වා පන පටිඝානුසයො පහීනො තස්ස කාමරාගානුසයො පහීනොති: ආමන්තා.

2. යස්ස කාමරාගානුසයො පහීනො තස්ස මානානුසයො පහීනොති: අනාගාමිස්ස කාමරාගානුසයො පහීනො, නො ච තස්ස මානානුසයො පහීනො. අරහතො කාමරාගානුසයො ච පහීනො. මානානුසයො ච පහීනො.

යස්ස වා පන මානානුසයො පහීනො තස්ස කාමරාගානුසයො පහීනොති: ආමන්තා.

3-4. යස්ස කාමරාගානුසයො පහීනො තස්ස දිට්ඨානුසයො -පෙ- විචිකිච්ඡානුසයො පහීනොති: ආමන්තා.

යස්ස වා පන විචිකිච්ඡානුසයො පහීනො තස්ස කාමරාගානුසයො පහීනොති: ද්වින්නං පුග්ගලානං විචිකිච්ඡානුසයො පහීනො, නො ච තෙසං කාමරාගානුසයො පහීනො. ද්වින්නං පුග්ගලානං විචිකිච්ඡානුසයො ච පහීනො, කාමරාගානුසයො ච පහීනො.

5-6. යස්ස කාමරාගානුසයො පහීනො තස්ස භවරාගානුසයො -පෙ- අවිජ්ජානුසයො පහීනොති: අනාගාමිස්ස කාමරාගානුසයො පහීනො, නො ච තස්ස අවිජ්ජානුසයො පහීනො. අරහතො කාමරාගානුසයො ච පහීනො අවිජ්ජානුසයො ච පහීනො.

යස්ස වා පන අවිජ්ජානුසයො පහීනො තස්ස කාමරාගානුසයො පහීනොති: ආමන්තා.

7. යස්ස පටිඝානුසයො පහීනො තස්ස මානානුසයො පහීනොති: අනාගාමිස්ස පටිඝානුසයො පහීනො, නො ච තස්ස මානානුසයො පහීනො. අරහතො පටිඝානුසයො ච පහීනො, මානානුසයො ච පහීනො.

යස්ස වා පන මානානුසයො පහීනො තස්ස පටිඝානුසයො පහීනොති: ආමන්තා.

8-9. යස්ස පටිඝානුසයො පහීනො තස්ස දිට්ඨානුසයො -පෙ- විචිකිච්ඡානුසයො පහීනොති: ආමන්තා.

යස්ස වා පන විචිකිච්ඡානුසයො පහීනො තස්ස පටිඝානුසයො පහීනොති: ද්වින්නං පුග්ගලානං විචිකිච්ඡානුසයො පහීනො නො ච තස්ස පටිඝානුසයො පහීනො. ද්වින්නං පුග්ගලානං විචිකිච්ඡානුසයො ච පහීනො, පටිඝානුසයො ච පහීනො.

10-11. යස්ස පටිඝානුසයො පහීනො තස්ස භවරාගානුසයො -පෙ- අවිජ්ජානුසයො පහීනොති: අනාගාමිස්ස පටිඝානුසයො පහීනො, නො ච තස්ස අවිජ්ජානුසයො පහීනො. අරහතො පටිඝානුසයො ච පහීනො, අවිජ්ජානුසයො ච පහීනො.

යස්ස වා පන අවිජ්ජානුසයො පහීනො තස්ස පටිඝානුසයො පහීනොති: ආමන්තා.

12-13. යස්ස මානානුසයො පහීනො තස්ස දිට්ඨානුසයො -පෙ- විචිකිච්ඡානුසයො පහීනොති: ආමන්තා.

යස්ස වා පන විචිකිච්ඡානුසයො පහීනො තස්ස මානානුසයො පහීනොති: තිණ්ණං පුග්ගලානං විචිකිච්ඡානුසයො පහීනො, නො ච තෙසං මානානුසයො පහීනො. අරහතො විචිකිච්ඡානුසයො ච පහීනො, මානානුසයො ච පහීනො.

14-15. යස්ස මානානුසයො පහීනො තස්ස භවරාගානුසයො -පෙ- අවිජ්ජානුසයො පහීනොති: ආමන්තා.

යස්ස වා පන අවිජ්ජානුසයො පහීනො තස්ස මානානුසයො පහීනොති: ආමන්තා.

16-18. යස්ස දිට්ඨානුසයො පහීනො තස්ස විචිකිච්ඡානුසයො පහීනොති: ආමන්තා.

යස්ස වා පන විචිකිච්ඡානුසයො පහීනො තස්ස දිට්ඨානුසයො පහීනොති: ආමන්තා.

19-20 යස්ස විචිකිච්ඡානුසයො පහීනො තස්ස භවරාගානුසයො -පෙ- අවිජ්ජානුසයො පහීනොති: තිණ්ණං පුග්ගලානං විචිකිච්ඡානුසයො පහීනො, නො ච තෙසං අවිජ්ජානුසයො පහීනො. අරහතො විචිකිච්ඡානුසයො ච පහීනො, අවිජ්ජානුසයො ච පහීනො.

යස්ස වා පන අවිජ්ජානුසයො පහීනො තස්ස විචිකිච්ඡානුසයො පහීනොති: ආමන්තා.

21. යස්ස භවරාගානුසයො පහීනො තස්ස අවිජ්ජානුසයො පහීනොති: ආමන්තා.

යස්ස වා පන අවිජ්ජානුසයො පහීනො තස්ස භවරාගානුසයො පහීනොති: ආමන්තා. (එකකමූලකං)