169. යස්ස කායසඞ්ඛාරො උප්පජ්ජිත්ථ තස්ස වචීසඞ්ඛාරො නිරුජ්ඣිස්සතීති: සවිතක්කසවිචාරපච්ඡිමචිත්තස්ස භඞ්ගක්ඛණෙ අවිතක්කඅවිචාරපච්ඡිමචිත්තසමඞ්ගීනං, යස්ස චිත්තස්ස අනන්තරා අවිතක්කඅවිචාරං පච්ඡිමචිත්තං උප්පජ්ජිස්සති තෙසං කායසඞ්ඛාරො උප්පජ්ජිත්ථ, නො ච තෙසං වචීසඞ්ඛාරො නිරුජ්ඣිස්සති. ඉතරෙසං තෙසං කායසඞ්ඛාරො ච උප්පජ්ජිත්ථ, වචීසඞ්ඛාරො ච නිරුජ්ඣිස්සති.
යස්ස වා පන වචීසඞ්ඛාරො නිරුජ්ඣිස්සති තස්ස කායසඞ්ඛාරො උප්පජ්ජිත්ථාති: ආමන්තා.
170-180. යස්ස කායසඞ්ඛාරො උප්පජ්ජිත්ථ තස්ස චිත්තසඞ්ඛාරො නිරුජ්ඣිස්සතීති: පච්ඡිමචිත්තස්ස භඞ්ගක්ඛණෙ තෙසං කායසඞ්ඛාරො උප්පජ්ජිත්ථ, නො ච තෙසං චිත්තසඞ්ඛාරො නිරුජ්ඣිස්සති. ඉතරෙසං තෙසං කායසඞ්ඛාරො ච උප්පජ්ජිත්ථ, චිත්තසඞ්ඛාරො ච නිරුජ්ඣිස්සති.
යස්ස වා පන චිත්තසඞ්ඛාරො නිරුජ්ඣිස්සති තස්ස කායසඞ්ඛාරො උප්පජ්ජිත්ථාති: ආමන්තා. -පෙ-
(යථා නිරොධවාරෙ අතීතානාගතා පුච්ඡා අනුලොමම්පි පච්චනීකම්පි විත්තා එවං උප්පාදනිරොධවාරෙපි අතීතානාගතා පුච්ඡා අනුලොමම්පි පච්චනීකම්පි විභජිතබ්බා අසම්මොහන්තෙන, නිරොධවාරෙන සදිසං, නත්ථි නානාකරණං.) (අනුලොමපුග්ගල)
අතීතානාගතවාරො.
උප්පාදනිරොධවාරො නිට්ඨිතො.
6. පරිඤ්ඤාවාරො
1-180. යො කායසඞ්ඛාරං පරිජානාති සො වචීසඞ්ඛාරං පරිජානාතීති: ආමන්තා.
යො වා පන වචීසඞ්ඛාරං පරිජානාති සො කායසඞ්ඛාරං පරිජානාතීති: ආමන්තා.
(යථා ඛන්ධයමකෙ පරිඤ්ඤාවාරං විභත්තං එවං සඞ්ඛාරයමකෙපි පරිඤ්ඤාවාරං විභජිතබ්බං.)
පරිඤ්ඤාවාරො නිට්ඨිතො.
සඞ්ඛාරයමකං නිට්ඨිතං.