73. යස්ස කායසඞ්ඛාරො නිරුජ්ඣති තස්ස වචීසඞ්ඛාරො නිරුජ්ඣිස්සතීති: ආමන්තා.

යස්ස වා පන වචීසඞ්ඛාරො නිරුජ්ඣිස්සති තස්ස කායසඞ්ඛාරො නිරුජ්ඣතීති: සබ්බෙසං චිත්තස්ස උප්පාදක්ඛණෙ විනා අස්සාසපස්සාසෙහි චිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො නිරුජ්ඣිස්සති, නො ච තෙසං කායසඞ්ඛාරො නිරුජ්ඣති. අස්සාසපස්සාසානං භඞ්ගක්ඛණෙ තෙසං වචීසඞ්ඛාරො ච නිරුජ්ඣිස්සති, කායසඞ්ඛාරො ච නිරුජ්ඣති.

74. යස්ස කායසඞ්ඛාරො නිරුජ්ඣති තස්ස චිත්තසඞ්ඛාරො නිරුජ්ඣිස්සතීති: ආමන්තා.

යස්ස වා පන චිත්තසඞ්ඛාරො නිරුජ්ඣිස්සති තස්ස කායසඞ්ඛාරො නිරුජ්ඣතීති: සබ්බෙසං චිත්තස්ස උප්පාදක්ඛණෙ, විනා අස්සාසපස්සාසෙහි චිත්තස්ස භඞ්ගක්ඛණෙ, නිරොධසමාපන්නානං, අසඤ්ඤසත්තානං තෙසං චිත්තසඞ්ඛාරො නිරුජ්ඣිස්සති නො ච තෙසං කායසඞ්ඛාරො නිරුජ්ඣති. අස්සාසපස්සාසානං භඞ්ගක්ඛණෙ තෙසං චිත්තසඞ්ඛාරො ච නිරුජ්ඣිස්සති, කායසඞ්ඛාරො ච නිරුජ්ඣති.

75. යස්ස වචීසඞ්ඛාරො නිරුජ්ඣති තස්ස චිත්තසඞ්ඛාරො නිරුජ්ඣිස්සතීති: සවිතක්කසවිචාර පච්ඡිමචිත්තස්ස භඞ්ගක්ඛණෙ තෙසං වචීසඞ්ඛාරො නිරුජ්ඣති, නො ච තෙසං චිත්තසඞ්ඛාරො නිරුජ්ඣිස්සති. ඉතරෙසං විතක්කවිචාරානං භඞ්ගක්ඛණෙ තෙසං වචීසඞ්ඛාරො ච නිරුජ්ඣති, චිත්තසඞ්ඛාරො ච නිරුජ්ඣිස්සති.

යස්ස වා පන චිත්තසඞ්ඛාරො නිරුජ්ඣිස්සති තස්ස වචීසඞ්ඛාරො නිරුජ්ඣතීති: සබ්බෙසං චිත්තස්ස උප්පාදක්ඛණෙ විනා විතක්කවිචාරෙහි චිත්තස්ස භඞ්ගක්ඛණෙ නිරොධසමාපන්නානං, අසඤ්ඤසත්තානං තෙසං චිත්තසඞ්ඛාරො නිරුජ්ඣිස්සති, නො ච තෙසං වචීසඞ්ඛාරො නිරුජ්ඣති. විතක්කවිචාරානං භඞ්ගක්ඛණෙ තෙසං චිත්තසඞ්ඛාරො ච නිරුජ්ඣිස්සති, වචීසඞ්ඛාරො ච නිරුජ්ඣති. (අනුලොමපුග්ගල)

76-78. යත්ථ කායසඞ්ඛාරො නිරුජ්ඣති -පෙ- (අනුලොමඔකාස)

79. යස්ස යත්ථ කායසඞ්ඛාරො නිරුජ්ඣති තස්ස තත්ථ වචීසඞ්ඛාරො නිරුජ්ඣිස්සතීති: දුතියජ්ඣානං, තතියජ්ඣානං සමාපන්නානං අස්සාසපස්සාසානං භඞ්ගක්ඛණෙ තෙසං තත්ථ කායසඞ්ඛාරො නිරුජ්ඣති, නො ච තෙසං තත්ථ වචීසඞ්ඛාරො නිරුජ්ඣිස්සති. පඨමජ්ඣානං සමාපන්නානං, කාමාවචරානං අස්සාසපස්සාසානං භඞ්ගක්ඛණෙ තෙසං තත්ථ කායසඞ්ඛාරො ච නිරුජ්ඣති, වචීසඞ්ඛාරො ච නිරුජ්ඣිස්සති.

යස්ස වා පන යත්ථ වචීසඞ්ඛාරො නිරුජ්ඣිස්සති තස්ස තත්ථ කායසඞ්ඛාරො නිරුජ්ඣතීති: පඨමජ්ඣානං සමාපන්නානං, කාමාවචරානං අස්සාසපස්සාසානං උප්පාදක්ඛණෙ, තෙසං යෙව විනා අස්සාසපස්සාසෙහි චිත්තස්ස භඞ්ගක්ඛණෙ රූපාවචරානං, අරූපාවචරානං තෙසං තත්ථ වචීසඞ්ඛාරො නිරුජ්ඣිස්සති, නො ච තෙසං තත්ථ කායසඞ්ඛාරො නිරුජ්ඣති. පඨමජ්ඣානං සමාපන්නානං, කාමාවචරානං අස්සාසපස්සාසානං භඞ්ගක්ඛණෙ තෙසං තත්ථ වචීසඞ්ඛාරො ච නිරුජ්ඣිස්සති, කායසඞ්ඛාරො ච නිරුජ්ඣති.

80. යස්ස යත්ථ කායසඞ්ඛාරො නිරුජ්ඣති තස්ස තත්ථ චිත්තසඞ්ඛාරො නිරුජ්ඣිස්සතීති: ආමන්තා.

යස්ස වා පන යත්ථ චිත්තසඞ්ඛාරො නිරුජ්ඣිස්සති තස්ස තත්ථ කායසඞ්ඛාරො නිරුජ්ඣතීති: සබ්බෙසං චිත්තස්ස උප්පාදක්ඛණෙ, විනා අස්සාසපස්සාසෙහි චිත්තස්ස භඞ්ගක්ඛණෙ තෙසං තත්ථ චිත්තසඞ්ඛාරො නිරුජ්ඣිස්සති, නො ච තෙසං තත්ථ කායසඞ්ඛාරො නිරුජ්ඣති. අස්සාසපස්සාසානං භඞ්ගක්ඛණෙ තෙසං තත්ථ චිත්තසඞ්ඛාරො ච නිරුජ්ඣිස්සති. කායසඞ්ඛාරො ච නිරුජ්ඣති.