73. යස්ස කායසඞ්ඛාරො උප්පජ්ජති තස්ස වචීසඞ්ඛාරො උප්පජ්ජිස්සතීති: ආමන්තා.

යස්ස වා පන වචීසඞ්ඛාරො උප්පජ්ජිස්සති තස්ස කායසඞ්ඛාරො උප්පජ්ජතීති: සබ්බෙසං චිත්තස්ස භඞ්ගක්ඛණෙ, විනා අස්සාසපස්සාසෙහි චිත්තස්ස උප්පාදක්ඛණෙ, නිරොධසමාපන්නානං, අසඤ්ඤසත්තානං තෙසං වචීසඞ්ඛාරො උප්පජ්ජිස්සති, නො ච තෙසං කායසඞ්ඛාරො උප්පජ්ජති. අස්සාසපස්සාසානං උප්පාදක්ඛණෙ තෙසං වචීසඞ්ඛාරො ච උප්පජ්ජිස්සති, කායසඞ්ඛාරො ච උප්පජ්ජති.

74. යස්ස කායසඞ්ඛාරො උප්පජ්ජති තස්ස චිත්තසඞ්ඛාරො උප්පජ්ජිස්සතීති: ආමන්තා.

යස්ස වා පන චිත්තසඞ්ඛාරො උප්පජ්ජිස්සති තස්ස කායසඞ්ඛාරො උප්පජ්ජතීති: සබ්බෙසං චිත්තස්ස භඞ්ගක්ඛණෙ, විනා අස්සාසපස්සාසෙහි චිත්තස්ස උප්පාදක්ඛණෙ, නිරොධසමාපන්නානං, අසඤ්ඤසත්තානං තෙසං චිත්තසඞ්ඛාරො උප්පජ්ජිස්සති, නො ච තෙසං කායසඞ්ඛාරො උප්පජ්ජති. අස්සාසපස්සාසානං උප්පාදක්ඛණෙ තෙසං චිත්තසඞ්ඛාරො ච උප්පජ්ජිස්සති, කායසඞ්ඛාරො ච උප්පජ්ජති.

75. යස්ස වචීසඞ්ඛාරො උප්පජ්ජිස්සති තස්ස චිත්තසඞ්ඛාරො උප්පජ්ජිස්සතීති: සවිතක්කසවිචාරපච්ඡිමචිත්තස්ස උප්පාදක්ඛණෙ තෙසං වචීසඞ්ඛාරො උප්පජ්ජිස්සති, නො ච තෙසං චිත්තසඞ්ඛාරො උප්පජ්ජිස්සති. ඉතරෙසං විතක්කවිචාරානං උප්පාදක්ඛණෙ තෙසං වචීසඞ්ඛාරො ච උප්පජ්ජති, චිත්තසඞ්ඛාරො ච උප්පජ්ජිස්සති.

යස්ස වා පන චිත්තසඞ්ඛාරො උප්පජ්ජිස්සති තස්ස වචීසඞ්ඛාරො උප්පජ්ජතීති: සබ්බෙසං චිත්තස්ස භඞ්ගක්ඛණෙ, විනා විතක්කවිචාරෙහි චිත්තස්ස උප්පාදක්ඛණෙ, නිරොධසමාපන්නානං, අසඤ්ඤසත්තානං තෙසං චිත්තසඞ්ඛාරො උප්පජ්ජිස්සති, නො ච තෙසං වචීසඞ්ඛාරො උප්පජ්ජති. විතක්කවිචාරානං උප්පාදක්ඛණෙ තෙසං චිත්තසඞ්ඛාරො ච උප්පජ්ජිස්සති, වචීසඞ්ඛාරො ච උප්පජ්ජති. (අනුලොමපුග්ගල)

76-78. යත්ථ කායසඞ්ඛාරො උප්පජ්ජති -පෙ- (අනුලොමඔකාස)

79. යස්ස යත්ථ කායසඞ්ඛාරො උප්පජ්ජති තස්ස තත්ථ වචීසඞ්ඛාරො උප්පජ්ජිස්සතීති: දුතියජ්ඣානං තතියජ්ඣානං සමාපන්නානං අස්සාසපස්සාසානං උප්පාදක්ඛණෙ තෙසං තත්ථ කායසඞ්ඛාරො උප්පජ්ජති, නො ච තෙසං තත්ථ වචීසඞ්ඛාරො උප්පජ්ජිස්සති. පඨමජ්ඣානං සමාපන්නානං කාමාවචරානං අස්සාසපස්සාසානං උප්පාදක්ඛණෙ තෙසං තත්ථ කායසඞ්ඛාරො ච උප්පජ්ජති, වචීසඞ්ඛාරො ච උප්පජ්ජිස්සති.

යස්ස වා පන යත්ථ වචීසඞ්ඛාරො උප්පජ්ජිස්සති, තස්ස තත්ථ කායසඞ්ඛාරො උප්පජ්ජතීති: පඨමජ්ඣානං සමාපන්නානං කාමාවචරානං අස්සාසපස්සාසානං භඞ්ගක්ඛණෙ, තෙසං යෙව විනා අස්සාසපස්සාසෙහි චිත්තස්ස උප්පාදක්ඛණෙ, රූපාවචරානං, අරූපාවචරානං තෙසං තත්ථ වචීසඞ්ඛාරො උප්පජ්ජිස්සති, නො ච තෙසං තත්ථ කායසඞ්ඛාරො උප්පජ්ජති. පඨමජ්ඣානං සමාපන්නානං, කාමාවචරානං අස්සාසපස්සාසානං උප්පාදක්ඛණෙ තෙසං තත්ථ වචීසඞ්ඛාරො ච උප්පජ්ජිස්සති, කායසඞ්ඛාරො ච උප්පජ්ජති.

80. යස්ස යත්ථ කායසඞ්ඛාරො උප්පජ්ජති තස්ස තත්ථ චිත්තසඞ්ඛාරො උප්පජ්ජිස්සතීති: ආමන්තා.

යස්ස වා පන යත්ථ චිත්තසඞ්ඛාරො උප්පජ්ජිස්සති තස්ස තත්ථ කායසඞ්ඛාරො උප්පජ්ජතීති: සබ්බෙසං චිත්තස්ස භඞ්ගක්ඛණෙ, විනා අස්සාසපස්සාසෙහි චිත්තස්ස උප්පාදක්ඛණෙ තෙසං තත්ථ චිත්තසඞ්ඛාරො උප්පජ්ජිස්සති, නො ච තෙසං තත්ථ කායසඞ්ඛාරො උප්පජ්ජති. අස්සාසපස්සාසානං උප්පාදක්ඛණෙ තෙසං තත්ථ චිත්තසඞ්ඛාරො ච උප්පජ්ජිස්සති, කායසඞ්ඛාරො ච උප්පජ්ජති.

81. යස්ස යත්ථ වචීසඞ්ඛාරො උප්පජ්ජති, තස්ස තත්ථ චිත්තසඞ්ඛාරො උප්පජ්ජිස්සතී’ති: සවිතක්කසවිචාර පච්ඡිමචිත්තස්ස උප්පාදක්ඛණෙ තෙසං තත්ථ වචීසඞ්ඛාරො උප්පජ්ජති, නො ච තෙසං තත්ථ චිත්තසඞ්ඛාරො උප්පජ්ජිස්සති. ඉතරෙසං විතක්කවිචාරානං උප්පාදක්ඛණෙ තෙසං තත්ථ වචීසඞ්ඛාරො ච උප්පජ්ජති. චිත්තසඞ්ඛාරො ච උප්පජ්ජිස්සති.

යස්ස වා පන යත්ථ චිත්තසඞ්ඛාරො උප්පජ්ජිස්සති තස්ස තත්ථ වචීසඞ්ඛාරො උප්පජ්ජතීති: සබ්බෙසං චිත්තස්ස භඞ්ගක්ඛණෙ, විනා විතක්කවිචාරෙහි චිත්තස්ස උප්පාදක්ඛණෙ තෙසං තත්ථ චිත්තසඞ්ඛාරො උප්පජ්ජිස්සති, නො ච තෙසං තත්ථ වචීසඞ්ඛාරො උප්පජ්ජති. විතක්කවිචාරානං උප්පාදක්ඛණෙ තෙසං තත්ථ චිත්තසඞ්ඛාරො ච උප්පජ්ජිස්සති, වචීසඞ්ඛාරො ච උප්පජ්ජති. (අනුලොමපුග්ගලොකාස)

82. යස්ස කායසඞ්ඛාරො නූප්පජ්ජති තස්ස වචීසඞ්ඛාරො නූප්පජ්ජිස්සතීති: සබ්බෙසං චිත්තස්ස භඞ්ගක්ඛණෙ, විනා අස්සාසපස්සාසෙහි චිත්තස්ස උප්පාදක්ඛණෙ, නිරොධසමාපන්නානං, අසඤ්ඤසත්තානං තෙසං කායසඞ්ඛාරො නූප්පජ්ජති, නො ච තෙසං වචීසඞ්ඛාරො නූප්පජ්ජිස්සති. පච්ඡිමචිත්තසමඞ්ගීනං, යස්ස චිත්තස්ස අනන්තරා අවිතක්කඅවිචාරං පච්ඡිමචිත්තං උප්පජ්ජිස්සති, තෙසං කායසඞ්ඛාරො ච නූප්පජ්ජති, වචීසඞ්ඛාරො ච නූප්පජ්ජිස්සති.

යස්ස වා පන වචීසඞ්ඛාරො නූප්පජ්ජිස්සති තස්ස කායසඞ්ඛාරො නූප්පජ්ජිස්සතීති: ආමන්තා.