1. යස්ස කායසඞ්ඛාරො උප්පජ්ජති තස්ස වචීසඞ්ඛාරො උප්පජ්ජතීති: විනා විතක්කවිචාරෙහි අස්සාසපස්සාසානං උප්පාදක්ඛණො තෙසං කායසඞ්ඛාරො උප්පජ්ජති, නො ච තෙසං වචිසඞ්ඛාරෙ උප්පජ්ජති. පඨමජ්ඣානං සමාපන්නානං කාමාවචරානං අස්සාසපස්සාසානං උප්පාදක්ඛණෙ තෙසං කායසංඛාරො ච උප්පජ්ජති. වචීසඞ්ඛාරො ච උප්පජ්ජති.

යස්ස වා පන වචීසඞ්ඛාරො උප්පජ්ජති තස්ස කායසඞ්ඛාරො උප්පජ්ජතීති: විනා අස්සාසපස්සාසෙහි විතක්කවිචාරානං උප්පාදක්ඛණෙ තෙසං වචීසඞ්ඛාරො උප්පජ්ජති, නො ච තෙසං කායසඞ්ඛාරො උප්පජ්ජති. පඨමජ්ඣානං සමාපන්නානං, කාමාවචරානං අස්සාසපස්සාසානං උප්පාදක්ඛණෙ තෙසං වචීසඞ්ඛාරො ච උප්පජ්ජති, කායසඞ්ඛාරො ච උප්පජ්ජති.

2. යස්ස කායසඞ්ඛාරො උප්පජ්ජති තස්ස චිත්තසඞ්ඛාරො උප්පජ්ජතීති: ආමන්තා.

යස්ස වා පන චිත්තසඞ්ඛාරො උප්පජ්ජති තස්ස කායසඞ්ඛාරො උප්පජ්ජතීති: විනා අස්සාසපස්සාසෙහි චිත්තස්ස උප්පාදක්ඛණෙ තෙසං චිත්තසඞ්ඛාරො උප්පජ්ජති, නො ච තෙසං කායසඞ්ඛාරො උප්පජ්ජති. අස්සාසපස්සාසානං උප්පාදක්ඛණෙ තෙසං චිත්තසඞ්ඛාරො ච උප්පජ්ජති, කායසඞ්ඛාරො ච උප්පජ්ජති.

3. යස්ස වචීසඞ්ඛාරො උප්පජ්ජති තස්ස චිත්තසඞ්ඛාරො උප්පජ්ජතීති: ආමන්තා.

යස්ස වා පන චිත්තසඞ්ඛාරො උප්පජ්ජති තස්ස වචීසඞ්ඛාරො උප්පජ්ජතීති: විනා විතක්කවිචාරෙහි චිත්තස්ස උප්පාදක්ඛණෙ තෙසං චිත්තසඞ්ඛාරො උප්පජ්ජති, නො ච තෙසං වචීසඞ්ඛාරො උප්පජ්ජති. විතක්කවිචාරානං උප්පාදක්ඛණෙ තෙසං චිත්තසඞ්ඛාරො ච උප්පජ්ජති, වචීසඞ්ඛාරො ච උප්පජ්ජති. (අනුලොමපුග්ගලං)

4. යත්ථ කායසඞ්ඛාරො උප්පජ්ජති තත්ථ වචීසඞ්ඛාරො උප්පජ්ජතීති: දුතියජ්ඣානෙ තතියජ්ඣානෙ තත්ථ කායසඞ්ඛාරො උප්පජ්ජති, නො ච තත්ථ වචීසඞ්ඛාරො උප්පජ්ජති. පඨමජ්ඣානෙ කාමාවචරෙ තත්ථ කායසඞ්ඛාරො ච උප්පජ්ජති, වචීසඞ්ඛාරො ච උප්පජ්ජති.

යත්ථ වා පන වචීසඞ්ඛාරො උප්පජ්ජති තත්ථ කායසඞ්ඛාරො උප්පජ්ජතීති: රූපාවචරෙ අරූපාවචරෙ තත්ථ වචීසඞ්ඛාරො උප්පජ්ජති, නො ච තත්ථ කායසඞ්ඛාරො උප්පජ්ජති. පඨමජ්ඣානෙ කාමාවචරෙ තත්ථ වචීසඞ්ඛාරො ච උප්පජ්ජති, කායසඞ්ඛාරො ච උප්පජ්ජති.

5. යත්ථ කායසඞ්ඛාරො උප්පජ්ජති තත්ථ චිත්තසඞ්ඛාරො උප්පජ්ජතීති: ආමන්තා.

යත්ථ වා පන චිත්තසඞ්ඛාරො උප්පජ්ජති තත්ථ කායසඞ්ඛාරො උප්පජ්ජතීති: චතුත්ථජ්ඣානෙ රූපාවචරෙ අරූපාවචරෙ තත්ථ චිත්තසඞ්ඛාරො උප්පජ්ජති, නො ච තත්ථ කායසඞ්ඛාරො උප්පජ්ජති. පඨමජ්ඣානෙ දුතියජ්ඣානෙ තතියජ්ඣානෙ කාමාවචරෙ තත්ථ චිත්තසඞ්ඛාරො ච උප්පජ්ජති. කායසඞ්ඛාරො ච උප්පජ්ජති.

6. යත්ථ වචීසඞ්ඛාරො උප්පජ්ජති තත්ථ චිත්තසඞ්ඛාරො උප්පජ්ජතීති: ආමන්තා.

යත්ථ වා පන චිත්තසඞ්ඛාරො උප්පජ්ජති තත්ථ වචීසඞ්ඛාරො උප්පජ්ජතීති: දුතියජ්ඣානෙ තතියජ්ඣානෙ චතුත්ථජ්ඣානෙ තත්ථ චිත්තසඞ්ඛාරො උප්පජ්ජති, නො ච තත්ථ වචීසඞ්ඛාරො උප්පජ්ජති. පඨමජ්ඣානෙ කාමාවචරෙ රූපාවචරෙ අරූපාවචරෙ තත්ථ චිත්තසඞ්ඛාරො ච උප්පජ්ජති, වචීසඞ්ඛාරො ච උප්පජ්ජති. (අනුලොම ඔකාස)

7-9. යස්ස යත්ථ කායසඞ්ඛාරො උප්පජ්ජති -පෙ- අනුලොමපුග්ගලොකාස

(යස්සකම්පි යස්සයත්ථකම්පි සදිසං)

10. යස්ස කායසඞ්ඛාරො නූප්පජ්ජති තස්ස වචීසඞ්ඛාරො නූප්පජ්ජතීති: විනා අස්සාසපස්සාසෙහි විතක්කවිචාරානං උප්පාදක්ඛණෙ තෙසං කායසඞ්ඛාරො නූප්පජ්ජති, නො ච තෙසං වචීසඞ්ඛාරො නූප්පජ්ජති. සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි අවිතක්ක අවිචාරචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං කායසඞ්ඛාරොච නූප්පජ්ජති, වචීසඞ්ඛාරො ච නූප්පජ්ජති.

යස්ස වා පන වචීසඞ්ඛාරො නූප්පජ්ජති තස්ස කායසඞ්ඛාරො නූප්පජ්ජතීති: විනා විතක්කවිචාරෙහි අස්සාසපස්සාසානං උප්පාදක්ඛණෙ තෙසං වචීසඞ්ඛාරො නූප්පජ්ජති, නො ච තෙසං කායසඞ්ඛාරො නූප්පජ්ජති. සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි අවිතක්කඅවිචාරචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො ච නූප්පජ්ජති, කායසඞ්ඛාරො ච නූප්පජ්ජති.