1. දුක්ඛං දුක්ඛසච්චන්ති: ආමන්තා. දුක්ඛසච්චං දුක්ඛන්ති: කායිකං දුක්ඛං චෙතසිකං දුක්ඛං ඨපෙත්වා අවසෙසං දුක්ඛසච්චං, න දුක්ඛං. කායිකං දුක්ඛං චෙතසිකං දුක්ඛං දුක්ඛඤ්චෙව දුක්ඛසච්චඤ්ච.

සමුදයො සමුදයසච්චන්ති: සමුදයසච්චං ඨපෙත්වා අවසෙසො සමුදයො සමුදයො, න සමුදයසච්චං. සමුදයසච්චං සමුදයො චෙව සමුදයසච්චඤ්ච. සමුදයසච්චං සමුදයොති: ආමන්තා.

නිරොධො නිරොධසච්චන්ති: නිරොධසච්චං ඨපෙත්වා අවසෙසො නිරොධො නිරොධො, න නිරොධසච්චං. නිරොධසච්චං නිරොධො චෙව නිරොධසච්චඤ්ච. නිරොධසච්චං නිරොධොති: ආමන්තා.

මග්ගො මග්ගසච්චන්ති: මග්ගසච්චං ඨපෙත්වා අවසෙසො මග්ගෙ මග්ගො, න මග්ගසච්චං, මග්ගසච්චං මග්ගො චෙව මග්ගසච්චඤ්ච, මග්ගසච්චං මග්ගොති: ආමන්තා (අනුලොම)

2. න දුක්ඛං න දුක්ඛසච්චන්ති: කායිකං දුක්ඛං චෙතසිකං දුක්ඛං ඨපෙත්වා අවසෙසං න දුක්ඛං, දුක්ඛසච්චං. දුක්ඛඤ්ච දුක්ඛසච්චඤ්ච ඨපෙත්වා අවසෙසං න චෙව දුක්ඛං න ච දුක්ඛසච්චං. න දුක්ඛසච්චං න දුක්ඛන්ති: ආමන්තා.

න සමුදයො න සමුදයසච්චන්ති: ආමන්තා. න සමුදයසච්ච න සමුදයොති: සමුදයසච්චං ඨපෙත්වා අවසෙසො සමුදයො න සමුදයසච්චං, සමුදයො. සමුදයඤ්ච සමුදයසච්චඤ්ච ඨපෙත්වා අවසෙසො න චෙව සමුදයො න ච සමුදයසච්චං.

න නිරොධො නිරොධසච්චන්ති: ආමන්තා. න නිරොධසච්චං න නිරොධොති: නිරොධසච්චං ඨපෙත්වා අවසෙසො නිරොධො න නිරොධසච්චං, නිරොධො. නිරොධඤ්ච නිරොධසච්චඤ්ච ඨපෙත්වා අවසෙසො න චෙව නිරොධො න ච නිරොධසච්චං.

න මග්ගො න මග්ගසච්චන්ති: ආමන්තා. න මග්ගසච්චං න මග්ගොති: මග්ගසච්චං ඨපෙත්වා අවසෙසො මග්ගො න මග්ගසච්චං, මග්ගො. මග්ගඤ්ච මග්ගසච්චඤ්ච ඨපෙත්වා අවසෙසො න චෙව මග්ගො. න ච මග්ගසච්චං. (පච්චනීක)

3. දුක්ඛං දුක්ඛසච්චන්ති: ආමන්තා. සච්චා සමුදය සච්චන්ති: සමුදයසච්චං සච්චඤ්චෙව සමුදයසච්චඤ්ච. අවසෙසා සච්චා සච්චා, න සමුදයසච්චං.

දුක්ඛං දුක්ඛසච්චන්ති: ආමන්තා. සච්චා නිරොධසච්චන්ති: -පෙ- සච්චා මග්ගසච්චන්ති: මග්ගසච්චං සච්චඤ්චෙව මග්ගසච්චඤ්ච. අවසෙසා සච්චා සච්චා, න මග්ගසච්චං.

සමුදයො සමුදයසච්චන්ති: සමුදයසච්චං ඨපෙත්වා අවසෙසො සමුදයො සමුදයො, න සමුදයසච්චං. සමුදයසච්චං සමුදයො චෙව සමුදයසච්චඤ්ච. සච්චා දුක්ඛසච්චන්ති: -පෙ- සච්චා නිරොධසච්චන්ති: -පෙ- සච්චා මග්ගසච්චන්ති: මග්ගසච්චං සච්චඤ්චෙව මග්ගසච්චඤ්ච. අවසෙසා සච්චා සච්චා, න මග්ගසච්චං.

නිරොධො නිරොධසච්චන්ති: නිරොධසච්චං ඨපෙත්වා අවසෙසො නිරොධො නිරොධො, න නිරොධසච්චං. නිරොධසච්චං නිරොධො චෙව නිරොධසච්චඤ්ච. සච්චා දුක්ඛසච්චන්ති -පෙ- සච්චා සමුදයසච්චන්ති, -පෙ- සච්චා මග්ගසච්චන්ති: මග්ගසච්චං සච්චඤ්චෙව මග්ගසච්චඤ්ච. අවසෙසා සච්චා සච්චා, න මග්ගසච්චං.

මග්ගො මග්ගසච්චන්ති: මග්ගසච්චං ඨපෙත්වා අවසෙසො මග්ගො මග්ගො, න මග්ගසච්චං. මග්ගසච්චං මග්ගො චෙව මග්ගසච්චඤ්ච. සච්චා දුක්ඛසච්චන්ති -පෙ- සච්චා සමුදයසච්චන්ති -පෙ- සච්චා නිරොධසච්චන්ති: නිරොධසච්චං සච්චඤ්චෙව නිරොධසච්චඤ්ච. අවසෙසා සච්චා සච්චා, න නිරොධසච්චං. (අනුලොම)

4. න දුක්ඛං න දුක්ඛසච්චන්ති: කායිකං දුක්ඛං චෙතසිකං දුක්ඛං ඨපෙත්වා අවසෙසං න දුක්ඛං, දුක්ඛසච්චං. දුක්ඛඤ්ච දුක්ඛසච්චඤ්ච ඨපෙත්වා අවසෙසං න චෙව දුක්ඛං න ච දුක්ඛසච්චං. න සච්චා න සමුදයසච්චන්ති: ආමන්තා.

න දුක්ඛං න දුක්ඛසච්චන්ති: කායිකං දුක්ඛං චෙතසිකං දුක්ඛං ඨපෙත්වා අවසෙසං න දුක්ඛං, දුක්ඛසච්චං, දුක්ඛඤ්ච දුක්ඛසච්චඤ්ච ඨපෙත්වා අවසෙසං න චෙව දුක්ඛං, න ච දුක්ඛසච්චං. න සච්චා න නිරොධසච්චන්ති -පෙ- න සච්චා න මග්ගසච්චන්ති: ආමන්තා.